Shymkentte 9-synyp oqýshysy óz-ózine qol saldy. Jasóspirimniń ólimine mekteptegi álimjettik sebep bolýy múmkin. Sebebi marqum sońǵy sátinde telefonyna birneshe synyptasynyń atyn jazyp ketipti dep habarlaidy Dalanews.kz Almaty.tv-ǵa siltep
Sútkenjesin joǵaltqan Janerke Júnisbekovanyń jan jarasyn sózben jetkizý múmkin emes. Ol osydan eki kún buryn jumystan oralǵanda qorada asylyp turǵan balasyn kórgen. Eseńgiregen ana ulynyń qazasyna mekteptegi álimjettik sebep boldy dep otyr.
"Ákesiniń qaitys bolǵanyna 3 jyl boldy. Mektepke barady, seniń ákeń joq dep balalar kemsitedi. Bul – bir. Dias degen bala temekimen qolyna basqan. "Sen bizge aqsha taýyp beresiń, maǵan temeki ákelip beresiń, meniń aitqanymmen júresiń. Men ne aitamyn, sonymen júresińder" dep qorqytqan", – dedi marqumnyń anasy Janerke Júnisbekova.
Ómiriniń sońǵy sátinde Ómirserik Sultanbek telefonyna jazba qaldyrǵan. 14 jastaǵy bala tórt synyptasynyń atyn atap, "endi meni ura almaityn boldyńdar" dep jazǵan.
Aita keteiik, marqum qaladaǵy №32 mektepte oqyǵan. Kezinde osy oqý ordasynda bilim alǵan Ómirseriktiń ápkesi de álimjettikke talai kýá bolǵanyn jasyrmady.
"Ol – burynnan kele jatqan zań. Bir-birinen aqsha talap etý, bir-birinen temeki talap etý bar. Myna jerde balalardyń bárinen surańyz, jaýap beredi. Qinańyzdar, kerek bolsa. Meniń inim soǵan shydai almai, dúnieden ótip otyr. Meniń 14 jastaǵy inim, meniń baýyr etim, júregim!" – dedi marqumnyń ápkesi.
Ómirseriktiń sońǵy hatynda atalǵan 4 oqýshy – onyń synyptastary. Mektep ákimshiligi olardyń biri tipti politsiia esebinde turǵanyn aitty. Biraq soǵan qaramastan, bilim mekemesiniń basshylyǵy oqý ordasyndaǵy álimjettik pen aqsha jinaý deregin joqqa shyǵaryp otyr. Degenmen qaiǵyly oqiǵa bolǵan kúni joldastar arasynda túsinbeýshilik bolǵanyn jetkizdi.
"Ókinishke qarai, jaǵdaidy estip otyrmyz. Ol jerde tóbelespegen, tek qolyn, iyǵyn tigizgen, urmaǵan", – dedi mektep direktorynyń tárbie isi jónindegi orynbasary Raihan Tóleeva.
Búginde qaiǵyly jaǵdai boiynsha qylmystyq is qozǵalyp, tergeý júrip jatyr. Qara jamylǵan otbasy balanyń ólimine kináliler sottalyp, mektep ákimshiligi jaýapqa tartylýyn talap etip otyr.
