Qaırat Qojamjarovqa qatysty sotqa deıingi tergep-tekserý bastaldy. Bul týraly Bas prokýratýra málimdedi, dep habarlaıdy Dalanews.kz. 

"Ekonomıkalyq qylmysqa jáne sybaılas jemqorlyqqa qarsy kúres agenttiginiń burynǵy tóraǵasy Q.P. Qojamjarovqa qatysty laýazymdyq ókilettikterin asyra paıdalaný, sondaı-aq, basshylyq laýazymdarda bolǵan ártúrli kezeńderde qylmystyq jolmen alynǵan aqshany zańdastyrý derekteri boıynsha sotqa deıingi tergep-tekserý bastaldy", - dep jazylǵan habarlamada.

Barlyq qylmystyq is boıynsha arnaıy prokýrorlardyń jetekshiligimen jedel tergeý toptary qurylǵan.

QR QPK 201-babyna sáıkes ózge aqparat jarıa etilmedi. 

Qaırat Qojamjarov týraly ne belgili?

Eske salaıyq, Qaırat Qojamjarov Qazaqstannyń qarjy polısıasyn basqarǵan. Qazaqstannyń bas prokýrory, Aqmola oblysynyń ákimi qyzmetterin de atqardy. Nursultan Nazarbaevtyń buıryǵymen senat depýtaty boldy. Bas prokýror qyzmetin atqarǵan kezde kóptegen rezonansty is negizsiz, oıdan shyǵarylǵan dep tanylǵan. Keıin onyń qaramaǵynda istegen qyzmetkerlerdiń ústinen qylmystyq ister qozǵalyp, qamaýǵa alyndy.

Kezinde Qojamjarovtyń artynan  "Qorǵas isinen" paıda kórgenderdiń  biri degen sóz ergen.