1–4 tamyz kúnderi Soltústik Kipr Túrik Respýblikasynyń astanasy Lefkosha qalasynda alǵash ret “Túrki dúniesiniń Kipr poeziia keshteri” atty halyqaralyq mádeni shara ótti. Bul igi bastama túrki tildes elderdiń ádebiet pen óner salasyndaǵy yntymaqtastyǵyn jańa deńgeige kóterdi.
Ózbekstan, Qyrǵyzstan, Qazaqstan, Ázerbaijan, Tatarstan, Bashqurtstan, Túrkiia, Kosovo, Makedoniia syndy elderden kelgen qalamgerler ortaq sahnada jyr oqyp, óz memleketteriniń bairaǵyn jelbiretti. Bul – túrki halyqtarynyń mádeni bailanysynyń, dostyq pen baýyrlastyq rýhynyń aiqyn kórinisi edi. Qazaq jurtynan arnaiy shaqyrylǵan Qazaqstan jazýshylary odaǵynyń múshesi, N.Ońdasynov atyndaǵy syilyqtyń laýreaty, aqyn - Ásel Ospan da Túrki dúniesine Qazaqtyń tamyryn jalǵap, kók týyn jelbiretip, “Túrik sazdaryna” sán qosyp keldi.
Is-shara barysynda Soltústik Kipr Túrik Respýblikasynyń Prezidenti - Ersin Tatar myrza túrki ádebietiniń damýyna úles qosqan qalamgerlerdi quttyqtap, olardy marapattady . Sondai-aq “Túrik ádebieti qorynyń” tóraǵasy - Serhat Kabakly myrzanyń bastamasymen uiymdastyrylǵan bul joba joǵary deńgeide ótip, bolashaqqa suranystar artty.
Kesh aiasynda “Túrki Álemi – Dede Qorqyt” atty kórme kópshilik nazaryna usynyldy. Belgili sýretshiler Saba Djafari Kabakly men Oktai Oksýzoǵlynyń týyndylary kórermenderge tereń áser qaldyrdy.
Sharanyń sánin túrki jyrshysy ári ánshi - Býniamin Aksýngýrdiń birneshe tilde shyrqaǵan áýezdi shyǵarmalary kópshilikti tánti etti.
Poeziia keshteri túrki áleminiń mádeni yntymaǵyn nyǵaityp qana qoimai, rýhani birliktiń de shynaiy kórinisi ekenin dáleldedi.
