Dziýdodan Parij Olimpiadasynyń chempiony Eldos Smetov Eýropa klýbynyń shaqyrýymen Ispaniianyń Madrid qalasynda dziýdodan tórt kúndik sheberlik sabaǵyn ótkizip jatyr. Bul – otandyq dziýdo mektebin halyqaralyq deńgeide ilgeriletýdegi mańyzdy qadam, dep habarlaidy Dalanews.kz.
Eldos Smetovtyń Eýropada dáris ótkizýi – otandyq sporttyń álemdik arenada moiyndalyp kele jatqanyn jáne elimizde dziýdonyń bedeli joǵary ekenin aiǵaqtaidy.
«Elimizde sheteldiń qyzyǵýshylyǵyn oiatyp, abyroiymyzdy asqaqtatyp, «Kimsiń?» degende – «Qazaqpyn» dep tanytatyn jańa býynnyń qalyptasýyna shyn júrekten tilektespin. Árqaisyńyzǵa densaýlyq, baqyt pen amandyq tileimin! Ár otbasyna myqty da bilimdi ul-qyzdardy tárbieleý násip etsin!», – dep jazdy Olimpiada chempiony óz paraqshasynda.
Eldos Smetov – myńdaǵan jas sportshyǵa úlgi. Onyń iri týrnirlerdegi jeńisteri, tabandylyǵy men tártibi jastarǵa shabyt berip keledi.
Memleket tarapynan da bul sportty damytýǵa júieli sharalar qabyldanýda. Qazirgi tańda elimizde 90 myńnan astam adam dziýdomen shuǵyldanyp, 1300 bapker eńbek etýde.
Memleket basshysynyń tapsyrmasyna sáikes, elimizge sheteldik dańqty jattyqtyrýshylardy tartý maqsatynda ulttyq quramaǵa 2025 jyldan bastap italiialyq maman Etsio Gamba shaqyryldy. Qurama jańartylǵan júie boiynsha jattyǵyp júr. Bapkerlik quramda keńesshi Robert Mshvidobadze, Stefano Frassinelli jáne otandyq jattyqtyrýshylar – Murat Keńtonov, Jansai Smaǵulov, Erlan Serikjanov, Ǵainýlla Esenǵaliev, Aleksandr Pletniov pen Qaliuly Qalen bar. Ulttyq quramanyń sapynda 46 er jáne 35 áiel sportshy bar. Jattyǵý jiyndary turaqty túrde Astanadaǵy Jaqsylyq Úshkempirov atyndaǵy Jekpe-jek saraiynda ótedi.
Sonymen qatar tóreshilerdi daiarlaý men damytýǵa da erekshe kóńil bólinýde. Qazaqstan dziýdo federatsiiasynyń tóreshiler komitetin London jáne Beijiń Olimpiadalarynyń arbitri Muhsin Nurtazin basqarady. Qazirgi tańda elimizde 11 halyqaralyq dárejedegi tóreshi jáne Aziia boiynsha 50 kontinenttik sanattaǵy tóreshi bar.
Elimizde jas erekshelikterine qarai bes resmi Qazaqstan chempionaty jáne 66 respýblikalyq týrnir ótkiziledi.
