Búgin Halyqaralyq «Qazaq tili» qoǵamynyń uıymdastyrýymen Astana qalasyndaǵy Nazarbaev ýnıversıtetinde Qazaqstan halqy tilderi kúni men ult ustazy Ahmet Baıtursynulynyń týǵan kúnine arnalǵan «Qazaq tili – ǵylym men tehnologıa tili» taqyrybynda respýblıkalyq konferensıa ótti.
Konferensıaǵa QR Ǵylym jáne joǵary bilim mınıstri Saıasat Nurbek, QR Sıfrlyq damý, ınovasıalar jáne aeroǵarysh ónerkásibi mınıstri Jaslan Madıev, «Qazaqtelekom» AQ basqarma tóraǵasy Baǵdat Mýsın, Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń bas dırektory Maqpal Jumabaı, sondaı-aq, ǵalymdar men sarapshy mamandar qatysty. Elimizdiń barlyq óńirinen til saıasatyna jaýapty mamandar men bilim basqarmalarynyń ókilderi onlaın formatta qosyldy.
Jıynda ǵylym, bilim, tehnologıa, til saıasaty jáne sıfrlyq damý salalary talqylanyp, memlekettik tildiń zamanaýı ǵylymı-sıfrlyq keńistiktegi orny men múmkindikteri qarastyryldy.
Halyqaralyq «Qazaq tili» qoǵamynyń prezıdenti Raýan Kenjehanuly qazaq tilindegi mátindi dybysqa aınaldyrýǵa arnalǵan «TTS» (Text-to-Speech) jobasyn tanystyrdy. Bul bastama qazaq tiliniń dybystyq qoryn jasandy ıntellekt ekojúıesine engizip, ony ǵylym men tehnologıa salasynda keńinen qoldanýǵa múmkindik beredi. Qazaqsha dybys modeli halyqaralyq Hugging Face platformasynda jarıalanady.
Konferensıa aıasynda Halyqaralyq «Qazaq tili» qoǵamy men Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy birlese otyryp, «Ulttyq dıktant» jobasyn resmı túrde bastady. Jobanyń maqsaty – jazý mádenıetin damytý, saýatty jazý daǵdylaryn qalyptastyrý jáne til arqyly ulttyq biregeılikti nyǵaıtý. Dıktant oflaın jáne onlaın formatta ótkiziledi, oǵan kez kelgen azamat qatysa alady.
Konferensıanyń resmı bóligi aıaqtalǵan soń qatysýshylardyń barlyǵy «Ulttyq dıktantqa» qatysty. Dıktantty belgili dıktor Qymbat Dosjan júrgizdi. Dıktant mátini qazaq ádebıeti klasıkteriniń shyǵarmalarynan tańdaldy. Qatysýshylarǵa baǵa qoıylmaıdy, árkim óz saýattylyǵyn ózi tekseredi.
Onlaın dıktantty www.til.kz platformasyndaǵy «Ulttyq dıktant» paraqshasynda kez kelgen ýaqytta kez kelgen jerde jazýǵa bolady. Qatysýshylarǵa elektrondy alǵys hat pen KITAP platformasyna tegin jazylym beriledi.
«Ulttyq dıktant» qorytyndysy jyl sońyna deıin jarıalanyp, jyl saıyn dástúrli túrde ótkiziledi.
