Senat Spikeri, Álemdik jáne dástúrli dinder liderleri Sezi Hatshylyǵynyń Basshysy Máýlen Áshimbaev Dinara Sátjan men Ádil Seifýlinniń Qogam News jobasyna bergen suhbatynda forýmnyń kózge kórinbeitin qyrlary týraly aityp berdi.
Alǵash qaraǵanda, qazirgi kezdegi rýhani kóshbasshylardy jahandyq máselelerdi talqylaý úshin bir ústel basyna jinaý ońai kórinýi múmkin. Alaida, Máýlen Áshimbaevtyń aitýynsha, árbir osyndai kezdesýdiń artynda Qazaqstannyń shetelderdegi diplomatiialyq missiialarynyń, Sezd Hatshylyǵy men kúrdeli geosaiasi jaǵdaida jáne shielenisken halyqaralyq qaishylyqtar aiasynda jumys isteitin yntaly toptyń orasan eńbegi jatyr.
– Prezidentimiz Qasym-Jomart Kemeluly Toqaev aldaǵy Sezge erekshe mán berip otyr. Bizdiń sheteldik áriptesterimiz de muny atap ótýde. Shyn máninde, búginde bárimiz baqylap, alańdap otyrǵan Taiaý Shyǵystaǵy shielenis kezinde rýhani kóshbasshylardy bir ústel basyna jinap, olardy betpe-bet otyryp, geosaiasat pen qazirgi álemdegi kúrdeli máselelerdi talqylaýǵa shaqyrý - ońai mindet emes. Iýdaizm men islam áleminiń liderlerin ǵasyrlar boiy jalǵasyp kele jatqan qaishylyqtar jaǵdaiynda qatar otyrǵyzý da ońai emes. Qazirgi zamanda bul qaishylyqtar jańa sipat alyp otyr.
Sondyqtan Sezd – bul jai ǵana shaqyrý qaǵazy jiberip, qatysýshylardyń kelýin kútetin qarapaiym konferentsiia emes. Bul – aýqymdy eńbektiń nátijesi. Rýhani kóshbasshylardyń jinalyp, beibitshilik pen dialog máselelerin talqylaýynyń ózi halyqaralyq ahýaldy turaqtandyrý turǵysynan mańyzdy qadam bolyp sanalady. Eger qatysýdan bas tartyp jatsa, biz dáiekti dálelder keltirip, túsindirýge tyrysamyz. Sonyń nátijesinde kóp jaǵdaida rýhani kóshbasshylardyń jaqyndasýyna qol jetkizemiz, – dedi Álemdik jáne dástúrli dinder liderleri Sezi Hatshylyǵynyń Basshysy.
