Almaty qalasynda Uly Otan soǵysynyń ardageri Anatolıı Nazarovıch Popovtyń 100 jyldyq mereıtoıy atalyp ótti, dep habarlaıdy Dalanews.kz.

Ardagerdi Almaty qalasynyń Qorǵanys isteri jónindegi departamenti men Bostandyq aýdanynyń Qorǵanys isteri jónindegi basqarmasynyń áskerı qyzmetshileri arnaıy baryp quttyqtady. Olar maıdangerge Qorǵanys mınıstriniń quttyqtaý haty men estelik syılyqtaryn tabystap, erligi men áskerı boryshqa adaldyǵy úshin alǵys aıtty.

Qonaqtardy jyly qarsy alǵan ardagerdiń qyzy Natalá Kosolapova otbasy atynan rızashylyǵyn bildirdi.
«Ákemizge kórsetilgen qamqorlyq pen qurmet úshin áskerı qyzmetshilerge shyn júrekten alǵys aıtamyz. Bul bizdiń otbasymyz úshin óte mańyzdy», – dedi ol.

Anatolıı Popov 1926 jylǵy 13 qańtarda Almaty oblysy Qaskeleń qalasynda dúnıege kelgen. Soǵys jyldarynda áskerı baılanysshy mamandyǵyn meńgerip, 2-shi Prıbaltıka maıdany quramynda shaıqasqan, Rıga túbindegi urystarǵa qatysqan. Ol «Rıgany azat etkeni úshin», «1941–1945 jyldardaǵy Uly Otan soǵysynda Germanıany jeńgeni úshin» medaldarymen jáne ózge de marapattarmen nagradtalǵan.

Soǵystan keıin Saratov áskerı-medısınalyq ýchılıshesin támamdap, Germanıada áskerı qyzmetin jalǵastyrǵan. Keıin Almatyǵa oralyp, zeınetke shyqqanǵa deıin sanıtarlyq-epıdemıologıalyq qyzmette feldsher bolyp eńbek etken.

Mereıtoı – maıdangerdiń Jeńiske qosqan úlesi men beıbit ómirdegi qajyrly eńbegine kórsetilgen qurmettiń belgisi boldy.