10 qańtarda Qazaqstan Respýblikasynyń Ulttyq ulany ózderiniń kásibi merekesin atap ótti. Osydan 34 jyl buryn qurylǵan áskeri qurylym búginde eldiń qoǵamdyq qaýipsizdigin qamtamasyz etýde, strategiialyq mańyzdy nysandardy qorǵaýda jáne tótenshe jaǵdailarda azamattardyń qaýipsizdigin saqtaýda mańyzdy ról atqaryp keledi, dep habarlaidy Dalanews.kz
Ataýly kúnge orai «Ońtústik» óńirlik qolbasshylyq basqarmasynda saltanatty jiyn ótti. Is-shara barysynda áskeri bólimderdiń Ulttyq ulan quramyndaǵy eleýli kezeńderin qamtyǵan beinesiýjetter kórsetilip, jeke quramǵa ótken jyldardaǵy jaýyngerlik jáne qyzmettik joly tanystyryldy.
Saltanatty jiynda «Ońtústik» óńirlik qolbasshylyǵynyń qolbasshysy general-maior Talapker Ámireev jeke quramdy kásibi merekemen quttyqtap, áskeri qyzmetshilerdiń el qaýipsizdigin qamtamasyz etýdegi eren eńbegin erekshe atap ótti.
— Ulttyq ulan jaýyngerleri — qoǵamdyq tártiptiń saqshylary, el tynyshtyǵynyń tiregi. Sizderdiń tabandy eńbekterińiz ben joǵary jaýapkershilikterińiz memleket qaýipsizdiginiń berik negizi bolyp tabylady, — dedi qolbasshy.
Saltanatty jiynda minsiz qyzmetimen jáne jaýyngerlik daiyndyqtaǵy joǵary kórsetkishterimen erekshelengen birqatar áskeri qyzmetshiler Qazaqstan Respýblikasy IIM orynbasary - Ulttyq ulan Bas qolbasshysynyń jáne óńirlik qolbasshynyń buiryqtaryna sáikes arnaiy tósbelgilermen, alǵys hattarmen jáne gramotalarmen marapattaldy.
Aita keteiik, Ulttyq ulannyń qurylǵan kúnine arnalǵan saltanatty sharalar «Ońtústik» óńirlik qolbasshylyqqa qarasty barlyq áskeri bólimderde de uiymdastyrylyp, jeke quramǵa rýh beretin mazmundy is-sharalar ótti.
