2026 jylǵy 13 qańtarda S. Seıfýllın atyndaǵy Qazaq agrotehnıkalyq zertteý ýnıversıtetinde ýnıversıtettiń kórnekti túlegi, Qazaqstannyń Eńbek Eri, «Rodına» agrofırmasy JSHS-niń bas dırektory, Qazaqstannyń eńbek sińirgen qaıratkeri, kásipker ári mesenat Ivan Adamovıch Saýerdiń esimi berilgen aýdıtorıanyń saltanatty ashylýy ótti, dep habarlaıdy Dalanews.kz
Atalǵan shara ýnıversıtet ómirindegi mańyzdy oqıǵaǵa aınalyp, oǵan memlekettik organdardyń ókilderi, Qazaqstan Respýblıkasy Parlamentiniń depýtattary, ǵylymı qaýymdastyq músheleri, agrarlyq kásiporyndardyń basshylary, qoǵam qaıratkerleri, sondaı-aq profesor-oqytýshylar quramy men stýdentter qatysty. Sonymen qatar is-sharaǵa Ivan Adamovıchtiń kýrstastary qatysyp, stýdenttik jyldardy eske alyp, bul bastamanyń ýnıversıtet pen onyń túlekteri úshin mańyzdylyǵyn atap ótti.
İs-shara aıasynda jańa býynǵa arnalǵan Smart-aýdıtorıa saltanatty túrde ashyldy. Zamanaýı mýltımedıalyq tehnologıalarmen jáne sıfrlyq oqytý elementterimen jabdyqtalǵan bul bilim berý keńistigi stýdentterdiń ıkemdi oılaý qabiletin qalyptastyrýǵa, praktıkalyq daǵdylaryn damytýǵa jáne zıatkerlik áleýetin arttyrýǵa baǵyttalǵan. Aýdıtorıa bilim berýdiń sıfrlyq transformasıasy talaptaryna tolyqtaı saı keledi.
Saltanatty rásim barysynda Ivan Adamovıch Saýerdiń ýnıversıtetti damytýǵa qosqan úlesine erekshe nazar aýdaryldy. Qoǵamdyq belsendiligimen jáne mesenattyq qyzmetimen tanymal ol kóptegen jyldar boıy bilim berý salasyndaǵy bastamalardy qoldap keledi. Ataýly aýdıtorıanyń ashylýy – onyń týǵan ýnıversıtetiniń ınfraqurylymyn damytýǵa, stýdentter men oqytýshylar úshin qolaıly ári tehnologıalyq bilim berý ortasyn qalyptastyrýǵa baǵyttalǵan ıgi isteriniń jalǵasy.
Saltanatty bólimde memlekettik organdardyń, Qazaqstan Respýblıkasy Parlamentiniń, Astana qalasy ákimdiginiń, Qazaqstan Respýblıkasy Aýyl sharýashylyǵy mınıstrliginiń, Qazaqstan Respýblıkasy Ǵylym jáne joǵary bilim mınıstrliginiń, sondaı-aq Ulttyq agrarlyq ǵylymı-bilim berý ortalyǵynyń ókilderi quttyqtaý sóz sóıledi.
Ýnıversıtet Basqarma Tóraǵasy – Rektor, QR UǴA akademıgi Qanat Maratuly Tireýov óz sózinde Ivan Adamovıch Saýer tulǵasynyń ýnıversıtet pen el úshin aıryqsha mańyzyn atap ótti.
«Bizdiń ýnıversıtet úshin Ivan Adamovıch Saýerdiń S. Seıfýllın atyndaǵy Qazaq agrotehnıkalyq zertteý ýnıversıtetiniń kórnekti túlegi ári qurmetti profesory ekeni erekshe qundy. Ol ǵylym men bilimniń mańyzyn árdaıym alǵa qoıady. Bul aýdıtorıa – jaı ǵana oqý orny emes, stýdentterdi eńbekqorlyqqa, jaýapkershilikke jáne týǵan jerge degen súıispenshilikke tárbıeleıtin shabyt mekeni», – dedi rektor.
Saltanatty sharanyń jalǵasy retinde Ivan Adamovıch Saýer «Agrarlyq bıznesti basqarý tájirıbesi jáne aýyl sharýashylyǵynyń ornyqty damýy» taqyrybynda ashyq dáris oqyp, óz tájirıbesimen jáne basqarýshylyq kózqarastarymen bólisti.
Ataýly Smart-aýdıtorıanyń ashylýy ýnıversıtettiń materıaldyq-tehnıkalyq bazasyn nyǵaıtýǵa jáne agrarlyq sala úshin ýaqyt talabyna saı, básekege qabiletti mamandar daıarlaýǵa baǵyttalǵan mańyzdy qadam boldy.
