Májilis depýtaty Únzila Shapaq premer-ministrdiń orynbasary – jasandy intellekt jáne tsifrlyq damý ministri Jaslan Mádievke mańyzdy saýal joldap, Roblox oiynyn shekteýdi usyndy, dep habarlaidy Dalanews.kz.
"Qazir internet pen onlain oiyn platformalary balalar men jasóspirimderdiń kúndelikti ómiriniń ajyramas bóligine ainaldy. Solardyń biri – Roblox onlain platformasy. Roblox sózin bilmeitin bala joq. Bul - paidalanýshylarǵa óz oiyndaryn qurýǵa, virtýaldy álemderde qarym-qatynas jasaýǵa jáne basqa oiynshylarmen tikelei bailanys ornatýǵa múmkindik beretin halyqaralyq platforma", - dedi ol.
Depýtat keltirgen 2025 jylǵy ashyq derekkózge sáikes Roblox platformasyna kiretin kúndelikti belsendi qoldanýshylar sany 150 millionǵa jýyq. Paidalanýshylardyń basym bóligi - kámeletke tolmaǵan balalar men jasóspirimder.
"Ata-analar, pedagogter jáne halyqaralyq sarapshylar tarapynan Roblox oiynynyń balalar psihikasyna keri áser etýi múmkin ekeni týraly alańdaýshylyq jii kóterilip otyr. Atap aitqanda, virtýaldy táýeldilik, agressivti minez-qulyq, shynaiy ómirden alshaqtaý, sondai-aq, jas ereksheligine sai kelmeitin kontentpen betpe-bet kelý faktileri kezdesedi", - dedi depýtat.
Únzila Shapaq buǵan deiin mádeniet jáne aqparat vitse-ministri Evgenii Kochetov "Roblox-ty bloktaý nemese shekteý máselesin qarastyrmaimyz" degenin eske saldy.
"Roblox platformasynyń balalar qaýipsizdigine, olardyń psihologiialyq damýyna áserine bailanysty birqatar memleket qatań sharalar qabyldap jatyr. Túrkiia, Katar, Resei, Qytai, Iran, Soltústik Koreia jáne basqa da memleketterde bul platforma buǵattaldy. Al Qazaqstanda ne sebepti áli kúnge deiin bul platformaǵa shekteý nemese tereń saraptamalyq baǵalaý júrgizilmei otyrǵany túsiniksiz kúiinde qalyp otyr", - dedi ol.
