Májilis depýtaty Elnur Beisenbaev Básekelestikti qorǵaý jáne damytý agenttiginiń tóraǵasy Marat Omarovqa joldaǵan depýtattyq saýalynda Qazaqstandaǵy kinonaryqtyń monopoliiaǵa ushyraǵanyn aityp, kinoteatr jelileriniń tabysty ádiletsiz bólip otyrǵanyna nazar aýdardy, dep habarlaidy Dalanews.kz.
Onyń aitýynsha, Memleket basshysy Qasym-Jomart Toqaev kreativti indýstriiany ulttyq ekonomikanyń basym baǵyty dep aiqyndaǵanymen, kino salasynda qalyptasqan jaǵdai bul maqsatqa kedergi keltirip otyr.
"Kino - jastardy tárbieleýde eń yqpaldy qural. Biraq qazir bul salada ádiletsizdik beleń alyp otyr", - dedi depýtat.
Kassadan birden 50 paiyz alady
Elnur Beisenbaevtyń sózinshe, iri kinoteatr jelileri ózderiniń ústem jaǵdaiyn paidalanyp, film prokatynyń alǵashqy kúninen bastap kassalyq túsimniń 50 paiyzyn alyp otyr.
Másele taza paidadan emes, tikelei jalpy tabystan - iaǵni satylǵan biletterden túsken barlyq qarjydan ustalyp otyrǵanynda. Bul kinojobalardyń ózin-ózi aqtaýyna úlken kedergi keltiredi.
"Rejisserler men prodiýserler kinoteatrlardyń qysymynan qorqyp, únsiz qalýǵa májbúr. Óitkeni olar osy jasandy monopoliiaǵa táýeldi", - dedi Beisenbaev.
Sonymen qatar, onyń aitýynsha, film avtorlary jarnama men ilgeriletý úshin bólek tólemder tóleýge, tipti "kóleńkeli jarnalar" berýge májbúr.
Memlekettik qarjyǵa túsirilgen filmderden de paida kóredi
Depýtatty erekshe alańdatqany - memlekettik qarjyǵa túsirilgen filmderden de kinoteatrlardyń iri úles alýy.
"Mysaly, memlekettik biýdjet esebinen túsirilgen “QAITADAN” filmi prokatta bir milliard teńgeden astam tabys tapty. Sonyń 550 milliony kinoteatrlarǵa ketti. Al memleket filmge bar bolǵany 190 million teńge bólgen", - dedi ol.
Tóleý sózben aitqanda, jekemenshik kinoteatr jelileri biýdjet qarjysy tolyq qaitarylmai turyp, odan birneshe ese kóp tabys alyp otyr. Depýtat muny jol berýge bolmaityn jaǵdai dep atady.
Naryqty "tańdaýly top" baqylap otyr
Beisenbaevtyń aitýynsha, qazir Qazaqstannyń kinonaryǵyn sanaýly ǵana jeliler baqylaýda ustap otyr.
Onyń keltirgen deregine súiensek, Kinopark pen Kinoplexx eldegi barlyq kinozaldyń 40 paiyzyna deiin ielik etedi, al Chaplin men Cinemax iri qalalarda ústemdikke ie.
"Olar ekrandy, praim-taimdy, tipti qai film kórermenge jetetinin ózderi sheshedi. Bul - ádil báseke emes, bul - taza monopoliialyq saiasat", - dedi depýtat.
"AMANAT" partiiasy fraktsiiasynyń ustanymyna sai, kinoteatrlar film ózin-ózi aqtamaiynsha, tabystan úles alýǵa tiis emes.
"Film óz shyǵynyn qaitarǵannan keiin ǵana paida ádil bólinýi kerek", - dedi Beisenbaev.
Ol AQSh-ta qoldanylatyn "syrǵymaly shkala" úlgisin mysalǵa keltirip, onda prokattyń alǵashqy aptalarynda stýdiialar tabystyń 70–90 paiyzyn alatynyn aitty.
Depýtat Básekelestikti qorǵaý jáne damytý agenttigin kinoteatrlar, prokatshylar jáne kinostýdiialar arasyndaǵy kelisimsharttardy tekserýge shaqyrdy.
"Kinoteatr jelileriniń ústem jaǵdaiyn paidalanyp, tabystyń 50 paiyzyn negizsiz iemdenýine keshendi tekserý júrgizilýi kerek", - dedi Elnur Beisenbaev.
Fraktsiia atynan ol bul salada ádil básekeni qalpyna keltirýdi jáne qazaqstandyq kinonyń ekonomikalyq tunshyǵýyn toqtatýdy talap etti.
