Qazaqstan halyqaralyq bedel indeksinde Ortalyq Aziia elderiniń arasynda taǵy da aldyńǵy orynǵa shyqty. CEOWORLD Magazine jariialaǵan Global Nations Reputation Index reitinginde elimiz 197 memleket arasynan 69-orynǵa jaiǵasqan., dep habarlaidy dalanews.kz.
Bul reiting elderdi 50 túrli kriterii boiynsha baǵalaidy. Onyń ishinde «jumsaq kúsh», ekonomikalyq jetistikter, innovatsiia, memlekettik basqarý sapasy, turaqty damý jáne halyqaralyq imidj siiaqty kórsetkishter bar.
Sarapshylardyń aitýynsha, investorlar belgili bir elge qarjy quiarda tek ekonomikanyń ósimi nemese zańnamany ǵana esepke almaidy. Olar memleket týraly halyqaralyq kózqarasqa, áleýmettik turaqtylyqqa, mádeni erekshelikterge jáne biznesti júrgizý jaǵdaiyna da nazar aýdarady.
Óitkeni eldiń halyqaralyq bedeli neǵurlym joǵary bolsa, soǵurlym ol investitsiia úshin tartymdy bolady. Bul investorǵa da oń imidj qalyptastyrady ári biznes júrgizýdiń qaýipsiz ári turaqty ekenin ańǵartady.
Mundai reitingterdiń el úshin birneshe artyqshylyǵy bar:
- sheteldik investitsiia kólemi artady;
- halyqaralyq saýda múmkindigi keńeiedi;
- shetelden týrister men bilikti mamandardy tartýǵa jol ashylady.
Qazaqstan qai orynda tur?
2026 jylǵy reitingte Qazaqstan 66,62 ball jinap, 69-orynǵa ornalasqan. El reitingte Katar memleketinen keiin tursa, Saýd Arabiiasy, Meksika jáne Malaiziia sekildi elderdi artta qaldyrǵan.
Al Ortalyq Aziiadaǵy ózge memleketterdiń kórsetkishi tómenirek bolyp shyqty:
- Túrikmenstan – 84-oryn, 61,88 ball;
- Ózbekstan – 134-oryn, 37,7 ball;
- Qyrǵyzstan – 145-oryn, 34,87 ball;
- Tájikstan – 160-oryn, 27,92 ball.
Qazaqstan nege alda keledi?
Sarapshylar Qazaqstan aimaqta investitsiia tartý men jańa jobalar sany boiynsha kóshbasshy bolyp otyrǵanyn aitady. Bul jaǵdai eldiń halyqaralyq bedeli joǵary ekenin taǵy bir márte kórsetken.
Mamandardyń pikirinshe, Qazaqstan ekonomikasynyń turaqty ósýi, investorlarǵa kórsetiletin qoldaý jáne kópvektorly syrtqy saiasat eldiń artyqshylyǵyna ainalyp otyr. Qazirgi geosaiasi jaǵdaida mundai faktorlar halyqaralyq naryq úshin erekshe mańyzdy sanalady.
