Pavlodarda belgisiz er adam jolaýshylar avtobýsynyń júrgizýshisine shabýyl jasap, ony uryp-soǵyp, betine burysh ballonyn shashqan. Oqiǵa saldarynan 58 jastaǵy júrgizýshi kóziniń himiialyq kúiigin alǵan, dep habarlaidy dalanews.kz.
Pavlodar oblystyq politsiia departamentiniń málimetinshe, qazir oqiǵaǵa qatysy bar adamdy anyqtaý jáne ustaý boiynsha sharalar júrgizilip jatyr.
Áleýmettik jelilerde oqiǵa túsirilgen video tarady. Ondaǵy aqparatqa sáikes, avtobýsqa mingen jigit pen qyz jolaqy tóleýden bas tartqan. Júrgizýshimen sózge kelgen jas jigit artqy alańnan kabinaǵa qarai júgirip kelip, rólde otyrǵan er adamdy birneshe ret judyryqpen urǵan.
Esin jiǵan júrgizýshi qarsylyq kórsetýge tyrysqan kezde, shabýyl jasaǵan adam onyń betine burysh ballonyn shashqan. Keiin ol avtobýstyń esigin ashpaq bolǵanymen, bul áreketi sátsiz aiaqtalǵan. Jolaýshylardyń jabyq salonda shabýyl jasaǵan adammen birge qalýy qaýipti bolǵandyqtan, júrgizýshi esikti ashqan. Osydan keiin jigit pen onyń janyndaǵy qyz avtobýstan túsip ketken.
Oblystyq densaýlyq saqtaý basqarmasynyń málimetinshe, 58 jastaǵy júrgizýshiniń kózdiń qasań qabyǵy men koniýnktivasy jeńil dárejede himiialyq kúiik alǵan. Qajetti emdeý-diagnostikalyq sharalardan keiin ol tirkelgen jeri boiynsha oftalmologtyń ambýlatoriialyq baqylaýyna jiberilgen.