Almatydaǵy ál-Farabi atyndaǵy Qazaq ulttyq ýniversitetiniń jataqhanasynda qaitys bolǵan birinshi kýrs stýdenti Daýyl Bákirtaidyń jaqyndary qaiǵyly oqiǵaǵa qatysty jańa málimetterdi jariialady. Marqumnyń týystary stýdenttiń buǵan deiin joǵary kýrs stýdentterinen álimjettik kórgenin aityp, onyń ólimine qatysy bolýy múmkin barlyq adamnyń jaýapqa tartylýyn talap etti, dep dalanews.kz tilshisi Ulysmedia.kz basylymyna silteme jasap habarlaidy.
Qaitys bolǵan stýdenttiń týysy Uldana Segizbaidyń aitýynsha, Daýyl Bákirtai jataqhanadaǵy jaǵdai týraly jaqyndaryna birneshe ret shaǵymdanǵan. Ol joǵary kýrs stýdentteriniń túrli syltaýmen tiisip, tún ishinde dúkenge jumsaitynyn aitqan. Týystary bul jaǵdaidyń qaiǵyly oqiǵamen aiaqtalatynyn kútpegenderin jetkizdi.
Marqumnyń týysynyń sózinshe, oqiǵa 15 qarashadan 16 qarashaǵa qaraǵan túni ýniversitet jataqhanasynda bolǵan. Onyń aitýynsha, ekinshi kýrsta oqityn segiz stýdent Daýyl Bákirtai men taǵy bir birinshi kýrs stýdentin bólmege shaqyryp alyp, soqqyǵa jyqqan.
Janjaldyń naqty neden bastalǵany belgisiz. Alaida týystarynyń málimetinshe, sol túni stýdentter ýniversitette ótetin bir is-sharaǵa daiyndalǵan.
"Olar túnde jataqhananyń bir bólmesine shaqyryp alyp, jabylyp urǵan eken. Artynsha anyqtaǵanymyzdai, ol sol túni ýniversitette ótetin bir sharaǵa daiyndalǵan eken. Odan keiin myna inim Daýyl Bákirtaidy jáne taǵy da bir balany shaqyryp alyp, tiisip bastaǵan", – dedi marqumnyń týysy.
Ol janjalǵa qatysqan bolýy múmkin stýdentterdiń sózin de jetkizdi.
"Shamasy, sharaǵa daiyndyq kezinde bir nársege kelise almai qaldy ma, bilmeimin. Kelip tiisip bastaǵan. Qasyndaǵy jábir kórgen balanyń bizge aitqany boiynsha, nege tiisip jatsyńdar degende: "Jai, sender bizge unamaisyńdar", – dep urǵan eken", – dedi ol.
Bul málimetter ázirge marqumnyń týystarynyń sózine negizdelgen. Quqyq qorǵaý organdary oqiǵaǵa qatysqan barlyq adamnyń áreketine qatysty tolyq resmi aqparat jariialaǵan joq.
Uldana Segizbaidyń aitýynsha, janjal kezinde Daýyl Bákirtai esinen tanyp qulaǵan. Onyń sózinshe, oqiǵaǵa qatysqan stýdentter bastapqyda jigit esin qaita jinaidy dep oilaǵan. Sol sebepti jedel járdem birden shaqyrylmaǵan.
"Basynda Daýyldy aiaýsyz urǵan, artynsha ol jerge qulaǵan kezde ekinshi kýrstyń stýdentteri ony talyp qaldy dep oilaǵan. Sodan ony esin jiǵyzý úshin qasyndaǵy dosyna onyń eki aiaǵyn aspanǵa qaratyp qoiýdy tapsyrǵan", – dedi týysy.
Ol oqiǵanyń túngi saǵat on ekiden keiin bolǵanyn, al jedel járdem shamamen saǵat 01:30-da shaqyrylǵanyn aitty. Marqumnyń jaqyndary meditsinalyq kómektiń kesh kórsetilgenine alańdap otyr.
"Sonda arada bir jarym saǵattai ýaqyt tekke ketti. Eger olar jedel járdemdi erterek shaqyrsa, múmkin, aman qalar ma edi", – dedi Uldana Segizbai.
Týysynyń aitýynsha, máiithanada olarǵa Daýyldyń júrek tusyna tigen aýyr soqqydan qaitys bolǵany aitylǵan. Sondai-aq ol marqumnyń keýde tusynda kógergen jáne qyzarǵan izder bolǵanyn málimdedi. Degenmen stýdenttiń óliminiń naqty sebebi sot-meditsinalyq saraptamanyń resmi qorytyndysymen ǵana anyqtalady. Ázirge mundai qorytyndy kópshilikke jariialanǵan joq.
Marqumnyń týystary ýniversitet jataqhanasynda joǵary kýrs stýdentteri tarapynan álimjettik kórsetilgenin málimdedi. Olardyń aitýynsha, Daýyl Bákirtai qaitys bolardan bir kún buryn Almatydaǵy týystarynyń úiine barǵan.
Sol kezde ol jataqhanadaǵy jaǵdaiǵa kóńili tolmaitynyn aityp, joǵary kýrsta oqityn stýdentterdiń mazasyn alatynyna shaǵymdanǵan.
"Qaza bolarynyń aldynda týysymyzdyń úiine kelgende, joǵary kýrs stýdentteri álimjettik kórsetip, mazasyn alatynyn aitty. Birese dúkenge bar, birese taǵy basqa dep tynyshtyǵyn alyp júrgen. Sol kúni kóńil kúii bolmai otyrǵan edi", – dedi Uldana Segizbai.
Onyń sózinshe, jataqhanada birinshi kýrs stýdentterine qatysty beiresmi talaptar qalyptasqan.
Atap aitqanda, ekinshi kýrs stýdentterine mindetti túrde «siz» dep sóileý, qol alysyp amandasý jáne úlken kýrsta oqityn qyzdarǵa erekshe qurmet kórsetý talap etilgeni aitylady.
"Ekinshi kýrsqa siz dep sóileý kerek, qol alyp amandasý kerek, tipti ekinshi kýrstyń qyzdaryn alystan kóre salysymen tike qaramai, birden amandasý kerek degen siiaqty miǵa syimaityn ózderiniń zańdaryn ornatyp alǵan", – dedi marqumnyń týysy.
Sondai-aq stýdentterdi tún ishinde turǵyzyp, dúkenge jumsaityny týraly da aitylǵan. Týystary mundai áreketterge ýniversitet ákimshiligi tarapynan tiisti baqylaý bolmaǵan bolýy múmkin dep alańdaýshylyq bildirdi.