Atyraýda qyzylsha órship tur ma? Bir jastaǵy bala qaitys boldy

Atyraýda qyzylsha órship tur ma? Bir jastaǵy bala qaitys boldy
depositphotos.com

Atyraý oblysynda bir jastaǵy bala aýyr halde infektsiialyq aýrýhanaǵa jetkizilgennen keiin kóz jumdy. Dárigerler onyń ómirin saqtap qala almady, dep habarlaidy dalanews.kz.

Atyraý oblystyq densaýlyq saqtaý basqarmasynyń málimetinshe, bala 14 qarashada Jylyoi aýdanynan sanitarlyq aviatsiia arqyly oblystyq infektsiialyq aýrýhanaǵa jetkizilgen. Oǵan deiin aýdandyq aýrýhanada em qabyldaǵan.

«Aýrýhanaǵa túsken kezde balanyń jaǵdaiy óte aýyr dep baǵalandy. Negizgi aýrýynyń aiasynda ekijaqty pnevmoniia, tynys alý jáne júrek jetkiliksizdigi damydy. Meditsina mamandary qarqyndy terapiianyń tolyq keshenin júrgizdi. Qabyldanǵan emge qaramastan, balany aman alyp qalý múmkin bolmady», – dep habarlady oblystyq densaýlyq saqtaý basqarmasynyń baspasóz qyzmeti.

Vedomstvo dereginshe, 2026 jylǵy 1 qazan men 17 qarasha aralyǵynda Atyraý oblysynda qyzylshanyń zerthanalyq jolmen rastalǵan 45 jaǵdaiy tirkelgen. Ótken jyldyń osy kezeńinde 78 jaǵdai anyqtalǵan.

Qazir aýrýhanada jeti adam em qabyldap jatyr. Olardyń tórteýinen qyzylsha zerthanalyq jolmen rastalsa, taǵy úsheýine ázirge kúdik bar.

Densaýlyq saqtaý basqarmasy aýrýhanaǵa jatqyzylǵan naýqastardyń basym bóligi qyzylshaǵa qarsy ekpe almaǵanyn atap ótti.