Joǵarǵy sottyń derekteri urlandy ma? Darknette milliondaǵan jazba satylymǵa qoiyldy

Joǵarǵy sottyń derekteri urlandy ma? Darknette milliondaǵan jazba satylymǵa qoiyldy
pixabay.com

Darknette Qazaqstan Joǵarǵy sotyna tiesili bolýy múmkin 507 mln jazbadan turatyn aqparat bazasy satylymǵa qoiyldy. Belgisiz satýshy bul derekter úshin 50 myń dollar, iaǵni shamamen 22,2 mln teńge surap otyr, dep habarlaidy dalanews.kz.

Kiberbarlaý salasynda jumys isteitin SOCRadar halyqaralyq kompaniiasy habarlandyrýdy 16 qarashada kóleńkeli internet alańdarynyń birinen anyqtaǵan. Brose laqap atymen tirkelgen qoldanýshy 2014-2026 jyldar aralyǵyndaǵy málimetter qamtylǵan 186 kestesi bar ekenin málimdegen.

Habarlandyrýdaǵy sipattamaǵa sáikes, satylymǵa shyǵarylǵan derekter bazasynda:

•⁠  ⁠azamattardyń jeke málimetteri boiynsha 16,6 mln jazba;
•⁠  ⁠sot protsesterine qatysýshylar týraly 13,3 mln jazba;
•⁠  ⁠kompaniialar týraly 6,8 mln jazba;
•⁠  ⁠jeke sáikestendirý nómirleri, tólqujat derekteri men tólem aqparaty;
•⁠  ⁠sot qujattary;
•⁠  ⁠qupiiasózderdiń heshteri, ákimshilik akkaýnttardyń derekteri men sessiia tokenderi bolýy múmkin.

Derekterdiń taraǵany rastaldy ma?

SOCRadar kompaniiasy ázirge atalǵan bazanyń shynaiylyǵyn rastaǵan joq. Mamandardyń túsindirýinshe, darknette habarlandyrýdyń paida bolýy Joǵarǵy sottyń aqparattyq júieleri buzylǵanyn nemese satýshyda shynymen osyndai kólemdegi málimet bar ekenin dáleldemeidi.

Degenmen kiberqaýipsizdik sarapshylary derekterdiń shynaiy ekeni anyqtalsa, onyń saldary eleýli bolýy múmkin ekenin eskertedi. Atap aitqanda, azamattardyń jeke málimetteri urlyqqa, qarjylyq alaiaqtyqqa paidalanylýy yqtimal. Al ákimshilik akkaýnttardyń derekteri men qupiia sot qujattarynyń jariia bolýy aqparattyq júielerge ruqsatsyz qol jetkizý qaýpin arttyrady.