Mońǵoliia prezidenti Ýhnaagiin Húrelsúh memleket basshysy qyzmetinen óz erkimen ketetinin málimdedi. Ol mundai sheshimdi ózine qatysty jemqorlyq aiyptaýlary kúsheigen tusta qabyldaǵan, dep habarlaidy dalanews.kz.
17 qarashada Mońǵoliia prezidenti Ýhnaagiin Húrelsúh baspasóz máslihatyn ótkizip, prezidenttik ókilettigin toqtatý týraly sheshim qabyldaǵanyn habarlady. Ol bul qyzmetti 2021 jylǵy 25 maýsymnan beri atqaryp keledi. Osy ýaqyt aralyǵynda bes jyldan astam ýaqyt el basqarǵan saiasatkerdiń prezidenttik merzimi 2027 jyly aiaqtalýy tiis bolatyn. Alaida memleket basshysy ókilettik merziminiń aiaqtalýyn kútpei, qyzmetinen ketýge niet bildirdi.
Halyqaralyq aqparat agenttikteriniń málimetinshe, prezidenttiń mundai sheshim qabyldaýyna onyń atyna aitylǵan jemqorlyqqa qatysty aiyptaýlar sebep bolǵan. Mońǵoliianyń oppozitsiialyq Demokratiialyq partiiasy memleket basshysy men birqatar joǵary laýazymdy sheneýnikti memlekettik jobalardy júzege asyrý barysynda zańsyz áreketterge bardy dep aiyptaǵan.
Atap aitqanda, daý temirjol qurylysyna qatysty memlekettik kelisimshart tóńireginde órbigen. Jariialanǵan aqparatqa sáikes, Ýhnaagiin Húrelsúh premer-ministr qyzmetin atqarǵan kezeńde temirjol jobasyna qatysty kelisimshartty berý kezinde zańsyz qarjylyq paida kórdi degen kúdikke ilingen. Alaida prezident ózine taǵylǵan aiyptaýlardy joqqa shyǵardy. Onyń aitýynsha, sońǵy ýaqytta memleket basshysynyń bedeline nuqsan keltirýge baǵyttalǵan áreketter jasalyp jatyr.
Húrelsúh taǵylǵan aiyptardyń negizsiz ekenin dáleldeý úshin qyzmetinen ketýge jáne tergeý organdarymen yntymaqtastyq ornatýǵa daiyn ekenin jetkizdi. Sondai-aq ol óziniń ar-namysy men iskerlik bedelin qorǵaý úshin quzyrly organdarǵa júginetinin málimdedi.
Mońǵoliia zańnamasyna sáikes, prezidenttiń qyzmetinen ketý týraly sheshimi birden kúshine enbeidi. Onyń otstavkasyn el parlamenti – Uly memlekettik hýral maquldaýy qajet.
Mońǵoliia parlamenti 126 depýtattan turady. Prezidenttiń ókilettigin merziminen buryn toqtatý máselesi osy zań shyǵarýshy organnyń qaraýyna beriledi. Sondyqtan Ýhnaagiin Húrelsúhtiń málimdemesi onyń prezidenttik qyzmetiniń resmi túrde aiaqtalǵanyn bildirmeidi. Túpkilikti sheshim parlamenttiń tiisti rásimderinen keiin qabyldanady.