Qazaqstanda antibiotikterdiń zańsyz saýdasy toqtamai tur

Qazaqstanda antibiotikterdiń zańsyz saýdasy toqtamai tur
pixabay.com

Qazaqstanda jyl basynan beri antibiotikterdi dáriger retseptisiz satqan dárihanalarǵa 8,2 mln teńgeden astam aiyppul salyndy. Osy ýaqyt ishinde 38 ákimshilik hattama toltyryldy, dep habarlaidy dalanews.kz.

Densaýlyq saqtaý ministrliginiń málimetinshe, antibiotikterdi bosatý tártibiniń saqtalýyna qatysty tekserýler jalǵasyp jatyr. Meditsinalyq jáne farmatsevtikalyq baqylaý komitetiniń aýmaqtyq departamentteri dárilerdi retseptisiz satý derekteri boiynsha Ákimshilik quqyq buzýshylyq týraly kodekstiń 426-babynyń 1-bóligine sáikes shara qabyldaǵan.

Salystyrmaly túrde aitsaq, 2023 jyly osyǵan uqsas 26 hattama toltyrylyp, 3,5 mln teńgeden astam aiyppul salynǵan. 2024 jyly 45 hattama boiynsha aiyppul kólemi 7,6 mln teńgeden assa, 2025 jyly 59 hattama toltyrylyp, 9,5 mln teńgeden astam aiyppul óndirilgen.

Ministrlik dereginshe, dárihanalarda retseptisiz satýǵa jii áreket jasalatyn antibiotikterdiń qatarynda azitromitsin, tseftriakson, tsefazolin jáne tsiprofloksatsin bar.

Mamandar antibiotikterdi dárigerdiń taǵaiyndaýynsyz qabyldaý bakteriialardyń dárilik preparattarǵa tózimdiligin arttyratynyn eskertedi. Bul infektsiialyq aýrýlardy emdeýdi qiyndatyp, antibiotikterdiń tiimdiligin tómendetýi múmkin.

Osy preparattardyń ainalymyn baqylaýdy kúsheitý úshin Densaýlyq saqtaý ministrligi Tsifrlyq ekonomikany damytý ortalyǵymen birlesip, joǵary táýekel tobyna jatatyn dárilerge mindetti elektrondyq retsept engizý jumystaryn júrgizip jatyr. Jańa júie dárilik zattardy tsifrlyq tańbalaý jáne qadaǵalaý júiesimen biriktiriledi.