Shymkentte qaza tapqan 21 jastaǵy qyzdyń ólimine qatysty tyń derekter shyqty, dep habarlaidy Dalanews.kz.
"KTK" telearnasy málimetinshe, Shymkenttiń ortalyǵynda pyshaqtalyp qaza tapqan Nuraidyń máiiti týǵan aýyly Tórtkólde jer qoinyna tapsyrylǵan.
Jaqyndarynyń aitýynsha, marqum men kúdikti byltyr toida tanysqan. Kóp ótpei, ony alyp qashqan kezde qyz kónbei ketip qalǵan. Biraq sodan beri boijetkendi ańdýyn qoimaǵan kórinedi.
"Qyz ben jigit tanys bolǵan. Biraq qyz bul jigitti unatpaǵan. Qyz ata-anasyna "bir jigit artymnan qalmaidy, telefonyma qaita-qaita qońyraý shalady" degen. Telefon arqyly qorqytyp, úrkitken. Kireberistiń aldynda qyzdy kútip otyrǵan. Bolmaǵan soń ata-anasy qala prokýratýrasy men Politsiia departamentine aryzdanǵan", - dedi marqumnyń týysy Kárimjan Kenjetaev.
Almatyda dizainer mamandyǵy boiynsha oqyp júrgen Nurai Serikbai qysqy demalysqa kelgen. Dúkenge shyqqanda ony torýyldaǵan kúdikti qinap sóilespek bolǵan. Biraq qyz kónbei, qashqan kezde artynan qýyp júrip pyshaqtaǵan.
"Altyndai, sondai aqyldy qyzymnan aiyrylyp otyrmyn. Tolyqtai jazasyn alsyn. Ómir boiyna sottalyp ketse de janym ashymaidy. Aiýandyqpen qyzymdy óltirdi. Eshqashan keshirýge bolmaidy", - dedi marqumnyń týysy Aigúl Saǵymbek.
Eske salaiyq, keshe politsiia qyzmetkerleri jedel izdestirý is-sharalary barysynda 21 jastaǵy jergilikti turǵyndy óltirdi degen kúdikti er adamdy ustady.
