Almatyda qalalyq Ádilet departamentiniń Almaty qalalyq advokattar alqasynyń advokaty Murat Adamdy litsenziiasynan aiyrý jónindegi talap-aryzy qaralyp jatyr. Sotqa júginýge Ishki ister organdarynyń usynysy negiz bolǵan. Atalǵan talap-aryz advokattyń kásibi qyzmetine, sondai-aq qoldanystaǵy zańnama men Kásibi etika kodeksiniń talaptaryn saqtaýyna beriletin baǵamen bailanysty, dep habarlaidy Dalanews.kz
Almaty qalasy Ádilet departamenti basshysynyń orynbasary Qanat Bazarbaevtyń aitýynsha, vedomstvonyń ustanymy advokattyń áreketterine qatysty naqty derekter men quqyqtyq baǵaǵa súiene otyryp qalyptastyrylǵan.
«Aldymen atap ótkim keletini, Ádilet departamentiniń sotqa bergen talaby tek advokattyń kásibi minez-qulqyna jáne onyń zańnama men Kásibi etika kodeksiniń talaptaryn saqtamaýyna qatysty. Talap-aryzdy berýge Ishki ister organdarynyń usynysy negiz boldy», – dedi Qanat Bazarbaev.
Onyń aitýynsha, bul iste sheshýshi mánge 2025 jylǵy 1 jeltoqsanda Almaty qalasynda júrgizilgen sanktsiialanǵan tergeý áreketteri ie. Dál sol kúni advokattyń ózin ustaýy, sondai-aq odan keiin qoǵamdyq keńistiktegi áreketteri quqyqtyq baǵalaýdyń nysanyna ainalǵan.
«2025 jylǵy 1 jeltoqsanda túski ýaqytta sanktsiialanǵan tintý júrgizile bastady. Al shamamen bir saǵattan keiin, túske taman, naqtyraq aitqanda saǵat 12:50-de keńsege advokat M. Adam keldi. Ol tergeý áreketterine qatysýǵa jiberýdi talap etti. Alaida mańyzdy jait – ol óziniń qorǵaýshy mártebesin rastaityn eshqandai qujat usynǵan joq. Iaǵni sol sátte M. Adam is júzinde protsess qatysýshysy bolmaǵanyn túsiný qajet», – dep túsindirdi Qanat Bazarbaev.
Almaty qalasynyń Ádilet departamentinde advokattyń protsessýaldyq mártebesi bolmaǵan jaǵdaida onyń tergeý áreketterine qatysýǵa quqyǵy joq ekenine nazar aýdardy. Alaida bul jait sol kúni-aq onyń qoǵamdyq keńistikte belsendi túrde málimdeme jasaýyna kedergi keltirmegen.
«Sol kúni sál keiinirek, shamamen saǵat 14:30-da, ol áleýmettik jelilerde (Facebook, YouTube, Instagram) 16 jariialanym taratyp úlgerdi. Ol jazbalarynda qorǵaýyndaǵy adamnyń quqyqtary buzyldy dep kórsetip, iske jiberilmegenin jáne tergeý tarapynan zańsyz áreketter boldy dep málimdedi. Muny ózi qoǵamdy jańylystyryp, derekterdi burmalap otyrǵanyn anyq bile tura jasaǵan. Munyń barlyǵy tiisti habarlama alynǵanǵa deiin bolǵan», – deidi Qanat Bazarbaev.
Vedomstvodan málimdegendei, keiin sot aktisimen sotqa deiingi tergep-tekserý organdarynyń áreketteriniń zańdylyǵy rastalǵan. Alaida soǵan qaramastan, áleýmettik jelilerdegi jariialanymdar shyǵarý jalǵasa bergen.
«2025 jylǵy 10 jeltoqsanda Almaty qalasynyń tergeý soty tergeý áreketterin zańdy dep tanyp, shaǵymdy qanaǵattandyrmaǵanyna qaramastan, advokat M. Adam áleýmettik jelilerde jalǵan jariialanymdar jasaýdy jalǵastyrdy. Bul jazbalar ruqsat etilgen quqyqtyq qorǵaý sheginen shyǵyp, sotqa deiingi tergep-tekserý organdary men sotqa qysym kórsetý retinde baǵalanýy múmkin. Atalǵan derekter vedomstvoaralyq tergeý-jedel tobynyń materialdarymen rastalady», – dep atap ótti Bazarbaev.
Almaty qalasynyń Ádilet departamentinde vedomstvonyń áreketteri tek quqyqtyq sipatta ekenin jáne advokatýra institýtynyń ózine qarsy baǵyttalmaǵanyn atap ótti.
«Ádilet departamenti óz qyzmetin tek zań aiasynda júzege asyratynyn atap ótkim keledi. Vedomstvo barlyq advokattar kásibi jaýapkershiliktiń birdei standarttaryn saqtaýǵa tiis degen ustanymdy qoldaidy», – dep atap ótti Qanat Bazarbaev.
Bazarbaev advokatýranyń táýelsizdigine qysym jasalyp jatyr degen málimdemelerge de jeke toqtaldy. Vedomstvo ókiliniń aitýynsha, advokattyq qyzmettiń táýelsizdigi – irgeli, negizgi qaǵidattardyń biri.
«Advokatýranyń táýelsizdigi – quqyqtyq memlekettiń negizgi qaǵidattarynyń biri jáne Ádilet ministrligi bul ustanymdy júieli túrde qoldaidy. Biz bir nárseni anyq túsinýimiz kerek: táýelsizdik jaýapkershiliktiń joqtyǵyn bildirmeidi. Zań men kásibi etika advokatqa belgili bir mindetter júkteidi. Advokattar quqyqpen jumys isteidi, bul óte mańyzdy. Iaǵni árbir advokat protsessýaldyq normalardy saqtaýǵa, sotpen jáne tergeý organdarymen durys ári saýatty qarym-qatynas ornatýǵa, óz qarsylyqtaryn quqyqtyq ári ádepti formada bildirýge mindetti. Muny ár advokat este ustaýǵa tiis», – dep túsindirdi Bazarbaev.
Sondai-aq ol bul jerde jeke pikir nemese kásibi daý týraly emes, sot sheshimi bar kezde shyndyqqa sáikes kelmeitini tanylǵan aqparattyń jariia túrde taratylýy jóninde sóz bolyp otyrǵanyn atap ótti.
«Naqty osy jaǵdaiǵa qatysty aitatyn bolsaq, munda tergeý áreketteri zańdy dep tanylǵan sot aktisi bola tura, shyndyqqa sáikes kelmeitin málimetterdiń jariia túrde taratylýy sóz bolyp otyr. Ádilet departamenti advokatýranyń táýelsizdigi men qoǵamnyń sot tóreligine degen senimi arasyndaǵy tepe-teńdikti saqtaý qajettigin basshylyqqa alady», – dep málimdedi Qanat Bazarbaev.
Spikerdiń aitýynsha, qoldanylatyn sharanyń túri zań talaptaryna sáikes aiqyndalady. Quqyqbuzýshylyqtyń sipatyna qarai zańda ártúrli áreket etý tetikteri qarastyrylǵan. Osy jaǵdaida tártiptik sharalarmen shektelmei, litsenziiadan aiyrý týraly talap-aryzben sotqa júginý týraly sheshim qabyldanǵan.
«Elimizdiń zańnamasynda advokattar jol beretin quqyqbuzýshylyqtarǵa qatysty yqpal etý sharalary qarastyrylǵan. Máselen, tártiptik komissiia bir rettik sipattaǵy buzýshylyqtardy, kásibi standarttardan eleýsiz aýytqýlardy, sondai-aq zań kómegin kórsetetin tulǵa retinde advokatqa degen senimdi joǵaltpai-aq túzetýge bolatyn jaǵdailardy qaraidy», – deidi Qanat Bazarbaev.
Alaida qaralyp otyrǵan jaǵdaida múlde ózge jaǵdai anyqtalǵan.
«Alaida bul jaǵdaida Ádilet departamenti óreskel zańbuzýshylyqtardyń birneshe ret oryn alǵanyn, olardyń jariia sipatta bolǵanyn, sondai-aq jalǵan aqparatty taratý úshin media men áleýmettik jelilerdiń júieli túrde paidalanylǵanyn anyqtady. Sonymen qatar tergeý áreketteriniń zańdylyǵyn rastaityn sot sheshimi eskerilmegen», – dep baiandady Qanat Bazarbaev.
Vedomstvo advokattyq qyzmet litsenziialanatyn qyzmet túrlerine jatatyny jáne Ádilet departamenti óz quzyreti aiasynda anyqtalǵan zańbuzýshylyqtarǵa mindetti túrde áreket etýge tiis ekenin eske saldy.
«Advokattyq qyzmet litsenziialanatyn salaǵa jatady, al Ádilet ministrligi litsenziia berýshi organ retinde anyqtalǵan buzýshylyqtarǵa jaýap qaitarýǵa mindetti. Osy jaǵdaida ministrlik advokattyń litsenziiasynan aiyrý týraly talap-aryzben sotqa júginý arqyly óz ókilettigin júzege asyryp otyr», – dep atap ótti ol.
Almaty qalasy Ádilet departamenti basshysynyń orynbasary Qanat Bazarbaevtyń aitýynsha, bul jaǵdaida litsenziiadan aiyrý jazalaý sharasy retinde emes, zańda kózdelgen kásibi qyzmet pen quqyqtyq júieni qorǵaý tetigi retinde qarastyrylyp otyr.
«Osynyń barlyǵyn eskere otyryp, litsenziiadan aiyrý kásibi standarttardy saqtaý men zań talaptarynyń oryndalýyn qamtamasyz etýge baǵyttalǵan, zańda kózdelgen shara retinde qarastyrylyp otyr», – dep túiindedi Qanat Bazarbaev.
