Qostanai qalasynyń 44 jastaǵy turǵyny Iýliia Hon TikTok-taǵy tikelei efirde qazaqtardy qorlaǵany úshin eki jylǵa sottaldy. Qostanaidaǵy №2 sot ony «ultaralyq arazdyqty qozdyrý» baby boiynsha kináli dep tanydy, dep habarlaidy Dalanews.kz Tobolinfo saityna silteme jasap.
Sot dereginshe, Hon 2024 jyldyń qarashasynda TikTok jelisindegi Resei men Ýkraina arasyndaǵy soǵys taqyryby talqylanǵan tikelei efirge qosylyp, sol jerde qazaqtarǵa qatysty qorlaityn sózder aitqan.
Isti qaraǵan sot aiyptalýshynyń kinási tikelei efirdiń beinejazbasymen, kýágerlerdiń aiǵaqtarymen jáne saraptama qorytyndylarymen dáleldengenin málimdedi. Hon óz kinásin ishinara moiyndaǵan. Úkimge sáikes, ol jazasyn eń tómengi qaýipsizdik deńgeiindegi koloniiada óteidi.
Aiyptalýshynyń advokaty Valerii Li Tobolinfo-ǵa bergen túsiniktemesinde tikelei efir barysynda Honnyń ózi de qorlanǵanyn, al onyń sózderi búkil ultqa emes, naqty bir adamǵa baǵyttalǵanyn aitty. Qorǵaýshy tarap úkimge shaǵym túsiretinin de málimdedi.
Sottyń habarlaýynsha, úkim shyǵarǵanda Honnyń kórý qabiletinen aiyrylǵan uly bar ekeni eskerilip, jaza jeńildetilgen.
