«QazTransOil» AQ Mańǵystaý oblysyndaǵy «Jetibai» jáne «Qarajanbas» munai tasymaldaý stantsiialarynda óndiristik infraqurylymdy jańǵyrtý jobalaryn aiaqtap, nysandardy paidalanýǵa berdi, dep habarlaidy Dalanews.kz.
Kompaniia málimetinshe, atalǵan jobalar ekologiialyq táýekelderdi azaitýǵa, óndiristik qaýipsizdikti arttyrýǵa jáne munai tasymaldaý júiesiniń turaqty jumysyn qamtamasyz etýge baǵyttalǵan.
«Jetibai» stantsiiasynda munaidy qaýipsiz saqtaý men tasymaldaýǵa arnalǵan jańartylǵan rezervýar parki iske qosyldy. Rezervýarlarǵa pontondar ornatylyp, munaidyń býlanýynan týyndaityn shyǵaryndylardy azaitý kózdelgen. Nysan quramyna árqaisysy 10 myń tekshe metrlik eki bolat rezervýar, órt sóndirý júiesi, sý qory saqtalatyn temirbeton rezervýarlar men tehnologiialyq qubyrlar kiredi. Sonymen qatar elektrmen jabdyqtaý, jaryqtandyrý jáne órtke qarsy júieler jańartylǵan.
Al «Qarajanbas» stantsiiasynda elektrmen jabdyqtaý júiesi qaita quryldy. Zamanaýi energoblok ornatylyp, rezervtik qorek kózi qamtamasyz etildi. Jobany iske asyrý barysynda 42 elektrjetek aýystyrylyp, jalpy uzyndyǵy 152 shaqyrym bolatyn jańa kabelder tartylǵan.
Kompaniia bul ózgerister stantsiialardyń qaýipsizdigin arttyryp, tehnologiialyq táýekelderdi tómendetýge múmkindik beredi dep otyr.
