Májilis depýtaty Maqsat Tolyqbai premer-ministrdiń orynbasary – mádeniet jáne aqparat ministri Aida Balaevaǵa depýtattyq saýal joldap, elde ataq-marapat satylyp jatqanyn synady, dep habarlaidy Dalanews.kz.
"Ataǵy joq, medal almaǵan kim qaldy? Aitaiyn degenim, ataqqumarlyq kádimgi dertke ainalyp barady. Marapat pen ataq – bazarda satylatyn sýviner siiaqty. Ataq satatyn aty belgisiz qoǵamdyq uiymdar medal, ordenderdi shúlen taratqandai ońdy-soldy úlestirip júr. Buǵan ózi toqtam bar ma?
Buǵan deiin bul máseleni áriptesterim de kóterdi. Arnaiy zań, norma da qabyldandy. Alaida bul úrdis kerisinshe údep barady. Máselen, "Qazaqstannyń qurmetti azamaty" tósbelgisi, "Qazaqstannyń eńbek sińirgen qyzmetkeri" medali jáne "Ult ustazy" deitin ataqtar keibir derekterge qaraǵanda ashyq ne jasyryn túrde 20 myńnan 100 myń teńgege deiingi aralyqta baǵalanady eken. Pysyqai uiymdar kádimgi záýlim ǵimarattardy jalǵa alyp, aqshasy bar kásipkerden bastap muǵalimge deiin qyzyl kilem tósep, sahnada saltanatty túrde turyp marapattaidy. Ózderi máz. Shyn máninde ne ataq alyp jatqanyn ózderi de bilmeidi", - dedi ol.
Depýtattyń pikirinshe, másele marapat qandai jolmen, qandai negizde berilip jatqanynda.
"Qun qalmady. Pysyqailar úshin bul biznes qana. Tipti "Ǵasyr ustazy", "Alash ustazy" deitin ataqtar shyǵypty. Tek aqshasyn tóleseń boldy, medal da, orden de, kýálik te, qysqasy, daiyn "shoý-paketke" birden ie bolasyń. Kóptegen damyǵan elde memlekettik marapattar - zańmen qorǵalatyn institýt. Ataqtar men nagradalardyń kriteriii naqty belgilenip, rásimdelýi ashyq túrde júzege asady. Bul júie nagradanyń bedelin saqtaýǵa, zańsyz saýdaǵa jol bermeýge, qoǵamda ádildik pen moraldyq tártipti qamtamasyz etýge múmkindik beredi. Al bizdiń elde she? Qaltasynda qarjysy nemese tanysy bar kez kelgen adam qoǵamdyq uiym ashyp alyp, ataq taratýmen ainalysa alady", - dep ashyndy ol.
Maqsat Tolyqbaidyń aitýynsha, eń qaýiptisi - "marapat biznesiniń" eń aldymen mektepterge enýi.
"Búginde ustazdyń kásibi deńgeii naqty nátije men bilim sapasymen emes, alǵys hat pen medal sany arqyly ólshenetindei jaǵdaiǵa jettik. Sonyń saldarynan muǵalimder oqýshyǵa bilim berýde emes, marapat jinaýda bir-birimen jarysa bastady. Bul - bilim júiesiniń irgetasyn shaiqaltatyn asa qaýipti qubylys. Qaptaǵan ataq taratqysh uiymdardyń kesirinen ataq pen marapatty toiǵa aparatyn jai syilyq deńgeiine deiin arzandatyp aldyq", - dep túiindedi ol.
