ءماجىلىس دەپۋتاتى ماقسات تولىقباي پرەمەر-مينيستردىڭ ورىنباسارى – مادەنيەت جانە اقپارات ءمينيسترى ايدا بالايەۆاعا دەپۋتاتتىق ساۋال جولداپ، ەلدە اتاق-ماراپات ساتىلىپ جاتقانىن سىنادى، دەپ حابارلايدى Dalanews.kz.

"اتاعى جوق، مەدال الماعان كىم قالدى؟ ايتايىن دەگەنىم، اتاققۇمارلىق كادىمگى دەرتكە اينالىپ بارادى. ماراپات پەن اتاق – بازاردا ساتىلاتىن سۋۆينەر سياقتى. اتاق ساتاتىن اتى بەلگىسىز قوعامدىق ۇيىمدار مەدال، وردەندەردى شۇلەن تاراتقانداي وڭدى-سولدى ۇلەستىرىپ ءجۇر. بۇعان ءوزى توقتام بار ما؟

بۇعان دەيىن بۇل  ماسەلەنى ارىپتەستەرىم دە كوتەردى. ارنايى زاڭ، نورما دا قابىلداندى. الايدا بۇل ءۇردىس كەرىسىنشە ۇدەپ بارادى. ماسەلەن، "قازاقستاننىڭ قۇرمەتتى ازاماتى" توسبەلگىسى، "قازاقستاننىڭ ەڭبەك سىڭىرگەن قىزمەتكەرى" مەدالى جانە "ۇلت ۇستازى" دەيتىن اتاقتار كەيبىر دەرەكتەرگە قاراعاندا اشىق نە جاسىرىن تۇردە 20 مىڭنان 100 مىڭ تەڭگەگە دەيىنگى ارالىقتا باعالانادى ەكەن. پىسىقاي ۇيىمدار كادىمگى ءزاۋلىم عيماراتتاردى جالعا الىپ، اقشاسى بار كاسىپكەردەن باستاپ مۇعالىمگە دەيىن قىزىل كىلەم توسەپ، ساحنادا سالتاناتتى تۇردە تۇرىپ ماراپاتتايدى. وزدەرى  ءماز. شىن مانىندە نە اتاق الىپ جاتقانىن وزدەرى دە بىلمەيدى"، - دەدى ول.

دەپۋتاتتىڭ پىكىرىنشە، ماسەلە ماراپات قانداي جولمەن، قانداي نەگىزدە بەرىلىپ جاتقانىندا.

"قۇن قالمادى. پىسىقايلار ءۇشىن بۇل بيزنەس قانا. ءتىپتى "عاسىر ۇستازى"، "الاش ۇستازى" دەيتىن  اتاقتار شىعىپتى. تەك اقشاسىن تولەسەڭ بولدى، مەدال دا، وردەن دە، كۋالىك تە، قىسقاسى، دايىن "شوۋ-پاكەتكە" بىردەن يە بولاسىڭ. كوپتەگەن دامىعان ەلدە مەملەكەتتىك ماراپاتتار - زاڭمەن قورعالاتىن ينستيتۋت. اتاقتار مەن ناگرادالاردىڭ كريتەرييى ناقتى بەلگىلەنىپ، راسىمدەلۋى اشىق تۇردە جۇزەگە اسادى. بۇل جۇيە ناگرادانىڭ بەدەلىن ساقتاۋعا، زاڭسىز ساۋداعا جول بەرمەۋگە، قوعامدا ادىلدىك پەن مورالدىق ءتارتىپتى قامتاماسىز ەتۋگە مۇمكىندىك بەرەدى. ال ءبىزدىڭ ەلدە شە؟ قالتاسىندا قارجىسى نەمەسە تانىسى بار كەز كەلگەن ادام قوعامدىق ۇيىم اشىپ الىپ، اتاق تاراتۋمەن اينالىسا الادى"، - دەپ اشىندى ول.

ماقسات تولىقبايدىڭ ايتۋىنشا، ەڭ ءقاۋىپتىسى - "ماراپات بيزنەسىنىڭ" ەڭ الدىمەن مەكتەپتەرگە ەنۋى.

"بۇگىندە ۇستازدىڭ كاسىبي دەڭگەيى ناقتى ناتيجە مەن ءبىلىم ساپاسىمەن ەمەس، العىس حات پەن مەدال سانى ارقىلى ولشەنەتىندەي جاعدايعا جەتتىك. سونىڭ سالدارىنان مۇعالىمدەر وقۋشىعا ءبىلىم بەرۋدە ەمەس، ماراپات جيناۋدا بىر-بىرىمەن جارىسا باستادى. بۇل - ءبىلىم جۇيەسىنىڭ ىرگەتاسىن شايقالتاتىن اسا ءقاۋىپتى قۇبىلىس. قاپتاعان اتاق تاراتقىش ۇيىمداردىڭ كەسىرىنەن اتاق پەن ماراپاتتى تويعا اپاراتىن جاي سىيلىق دەڭگەيىنە دەيىن ارزانداتىپ الدىق"، - دەپ تۇيىندەدى ول.