Almatyda Ulttyq kitap kúnine orai alǵashqy respýblikalyq kitaphanalyq hakaton uiymdastyryldy. Bul is-shara Alatau Creative Hub ortalyǵynda ótip, Qazaqstannyń túkpir-túkpirinen kelgen jas kitaphanashylardy biriktirdi. Is-sharany Almaty qalasynyń kitaphanalary uiymdastyrdy, oǵan qala ákimdigi, Qazaqstan Respýblikasynyń Ulttyq kitaphanasy jáne Ǵylym ordasy qoldaý kórsetti,– dep habarlaidy Dalanews.kz
Eldegi kitaphana isin jańǵyrtýdyń kóshbasshylary sanalatyn almatylyq kitaphanashylar tájiribesin, bilimin ózge óńirdegi áriptesterimen bólise bastady. Hakaton – tájiribe almasýǵa, jańa qyzmet túrlerin talqylaýǵa jáne kitaphana salasyna tsifrlyq tehnologiia engizý máselesin qaraýǵa arnalǵan mańyzdy alańǵa ainaldy.
Búginde Almaty kitaphanalardy jańǵyrtýda jetekshi orynda. Munda táýlik boiy jumys isteitin 24/7 kitaphanalar, avtonomdy kitaphanalar, RFID júiesi jáne tsifrlyq oqý zaldary jumys isteidi. Bul bastamalardy Memleket basshysy Qasym-Jomart Toqaev tarapynan joǵary baǵalap, ózge óńir ákimderin megapolistiń ozyq tájiribesin qabyldaýǵa shaqyrǵan bolatyn.
Hakaton qatysýshylary kitaphana salasyn damytýǵa baǵyttalǵan jobalar men ideiasyn tanystyrdy. Almatylyq jas mamandar qala ákimdiginiń qoldaýymen Ońtústik Koreia, Shveitsariia, Germaniia, Finliandiia, Estoniia jáne Shvetsiia elderinde halyqaralyq taǵylymdamadan ótip, sheteldik úzdik tájiribe men olardy jergilikti jaǵdaiǵa beiimdeý tásilin aitty.
«Búgingi kitaphanalyq hakaton joǵary deńgeide ótti. Eldiń túkpir-túkpirinen kelgen mamandar keremet ideia men tyń kózqaras usyndy. Biz áriptesterimizdiń jobasynan shabyt alyp, tájiribemizdi qýana bólistik», – dedi Batys Qazaqstan oblysy, Birlik aýylynyń kitaphanashysy, hakaton qatysýshysy Gúlbaqyt Dúisen.
Alǵashqy hakaton jas kitaphanashylardyń kásibi damýy jolyndaǵy mańyzdy qadam ǵana emes, sonymen qatar, Qazaqstan kitaphanalarynyń jańǵyrýǵa, innovatsiia engizýge jáne eldiń mádeni-oqý ómirindegi ornyn nyǵaitýǵa degen umtylysynyń jarqyn dáleli boldy.
Aita keteiik, búginde Almatyda qala ákimdigine qarasty 30-ǵa jýyq kitaphana jumys isteidi, onyń 95%-y tolyqtai jańǵyrtýdan ótip, materialdyq-tehnikalyq bazasy jańartylǵan. Bul kitaphanalarǵa zamanaýi talaptarǵa sai bolýǵa ǵana emes, oqyrmandarǵa qyzmet kórsetýdiń innovatsiialyq formatyn engizýge múmkindik beredi. Aita keterligi, jyl saiyn qala kitaphanalarynda 3 millionnan astam kelýshi tirkeledi.
