Áleýmettik jelilerde Jambyl oblysy boiynsha QR Bas prokýratýrasynyń Quqyq qorǵaý organdarynyń qyzmetin úilestirý departamentiniń qazirgi qyzmetkeri Áliia Qojabekovanyń taǵy bir beineúndeýi tarady, dep habarlaidy Dalanews.kz.
Ol alǵashqy úndeýleri qyzý talqylanyp, jelige tarap ketkennen keiin prezident ákimshiligi, bas prokýratýra, quqyqtyq statistika jáne arnaiy esepke alý komiteti ony jumystan qýýdy qolǵa alýy múmkin.
– Memlekettik organdar meni qaralap, jazǵandarymdy jalǵan etip kórsetýge tyrysady. Biraq shyndyqtan basqa jol joq. Men túsinemin, áleýmettik jelide mundai nárseni aitý – ózime jaý tabýmen teń. Biraq bul men úshin birinshi ret emes, – deidi ol.
«2024 jyly barlyq jaýapty organdarǵa birneshe ret júgindim»
Qojabekova 2024 jyly Bas prokýror Berik Asylovqa, komitet tóraǵasy Nurlybai Sabitke, sondai-aq Prezident ákimshiligine birneshe ret resmi túrde hat jazyp, Jambyl oblysy boiynsha departamenttegi zańbuzýshylyqtar týraly málimdegenin aitady. Sonymen qatar UQK men Sybailas jemqorlyqqa qarsy agenttikke de resmi túrde júgingen.
– Biraq meniń barlyq ótinishterim tek sol baiaǵy Komitetke, iaǵni zań buzýshylyqqa qatysy bar qurylymǵa qaitarylyp otyr. Bul bir ainaldyrsa, shyr ainaldyrǵan problema boldy, – deidi prokýror.
Birinshi fakt
2022 jyldyń qarashasynda Jambyl oblysy boiynsha departament qyzmetkeri para alý ústinde ustalyp, Taraz qalalyq soty arqyly sottalǵan. Biraq departament basshysy Seker Búrkitbaev eshqandai jaýapkershilikke tartylmaǵan.
– Bul qyzmetker adamdardy «sottalǵandyǵyńdy óshirem» dep aldap, aqsha alǵan. Biraq basshylyqqa shara qoldanylmady, – deidi Qojabekova.
Ekinshi fakt
2023 jyly Búrkitbaev zańsyz buiryq shyǵaryp, departamenttiń bir qyzmetkerin jumystan shyǵarǵan. Biraq 2024 jyldyń sáýirinde Taraz qalalyq soty bul buiryqty zańsyz dep tanyp, qyzmetkerdi qaitadan jumysqa qabyldatqan. Alaida basshylyqqa bul úshin de eshqandai shara qoldanylmaǵan.
Úshinshi fakt
2024 jyly departamenttegi birqatar qyzmetkerler – orynbasar Kalabaev Baqytjan men aǵa prokýror Kenjebekov Begzat – qylmystyq isterdi tirkeý boiynsha bazasynda zańsyz ózgertýler engizgeni úshin tártiptik jaza alǵan. Biraq Búrkitbaev taǵy da jaýapsyz qaldy.
– Bul faktini men ózim anyqtadym. Al tekserý jumystary meniń birneshe ret hat jazýymnan keiin ǵana qozǵaldy, – deidi ol.
«Tekserý júrgizilmei jatyp, qorytyndysy aldyn ala belgili boldy»
Prokýror 2025 jylǵy 23 sáýir kúni saǵat 18:00-de eOtinish portaly arqyly Bas prokýratýradan resmi jaýap alǵanyn aitady. Biraq jaýap Komitet tóraǵasynyń orynbasary Qusaiynovtyń qolymen berilgen. Onyń aitýynsha, bul – sol zańbuzýshylyqtar oryn alǵan organnyń ózinen kelgen jaýap.
– Biraq dál sol kúni tańerteń, 9:00 shamasynda, áleýmettik jelide «faktiler rastalmady» degen jazba jariialandy. Sonda meniń ótinishim qaralmai jatyp, nátije aldyn ala belgili bolǵan ba? Bul – Búrkitbaev pen onyń komandasyn aqtap alýdyń kezekti amaly, – deidi Qojabekova ashynyp.
Onyń pikirinshe, bul – Genprokýratýra tarapynan eshqandai shynaiy tekserý júrgizilmegeniniń aiqyn dáleli.
«Búrkitbaev pen onyń qoldaýshylaryn tekserýdi talap etemin»
Qojabekova Bas prokýratýra men Antikordan myna tulǵalarǵa qatysty naqty shara qoldanýdy suraidy: Seker Búrkitbaev, Kalaspaev, Kalabaev, Kenjebekov, Kenbaev jáne Izmaǵambetova.
– Eger bul bazalardaǵy ózgerister qasaqana jáne tegin emes jasalǵan bolsa, bul – tártiptik jaza emes, qylmystyq jaýapkershilikpen qaralýy tiis jaǵdai, – deidi ol.
Qojabekova sondai-aq 2013–2023 jyldar aralyǵyndaǵy sotqa deiingi tergep-tekserýdiń biryńǵai tizilimi júiesindegi málimetterge jasalǵan ózgeristerdiń zańdylyǵyn tekserýdi suraidy. Onyń aitýynsha, bul zańsyz túzetýler júieli túrde, josparly túrde jasalǵan jáne olardyń naqty ýaqyty, oryndalǵan qoldanýshy týraly málimetter saqtalyp, prokýratýra qyzmetkerlerine qoljetimdi.
– Men prokýratýra qyzmetkeriniń otbasynda tárbielendim. Ákem Ermek Tikimbaiuly Qojabekov – ádil, bilimdi, adal prokýror boldy. Ol óziniń eńbegimen "Qurmetti qyzmetker" ataǵyn aldy. Men osy rýhta, ádilettilik pen ar-namysty bárinen biik qoiatyn tárbie aldym. Bul – meniń qyzmettik boryshym, – deidi Áliia Qojabekova.
Ol zań buzýshylyqtarǵa kim jol berse de, onymen kúresýge mindetti ekenin atap ótti.
Prezidentke ashyq úndeý: «Barlyq beineúndeýlerimdi jeke baqylaýyńyzǵa alyńyz»
Áliia Qojabekova sońǵy sózinde Qazaqstan Prezidentinen barlyq beineúndeýlerine jeke baqylaý ornatyp, tiisti sheshim qabyldaýdy surady.
– Eger Bas prokýratýra men Komitet meniń hattarymdy elemeitin bolsa, men Prezidentke tek áleýmettik jeli arqyly júginýge májbúrmin. Bul – meniń jalǵyz jolym, – dep qorytyndylady ol.
PROKÝRATÝRANYŃ JAÝABY
Búgin bas prokýratýra bul iske qatysty jaýap qatty.
"Bas Prokýrordyń tapsyrmasy boiynsha aitylǵan ýájderdi tekserý úshin Jambyl oblysyna Bas prokýratýranyń Ishki qaýipsizdik departamenti men tiisti qurylymdyq bólimshesiniń qyzmetkerleri, sondai-aq Komitet Tóraǵasynyń orynbasary kiretin jumys toby jiberildi", deidi prokýrorlar.
