الەۋمەتتىك جەلىلەردە جامبىل وبلىسى بويىنشا ق ر باس پروكۋراتۋراسىنىڭ قۇقىق قورعاۋ ورگاندارىنىڭ قىزمەتىن ۇيلەستىرۋ دەپارتامەنتىنىڭ قازىرگى قىزمەتكەرى ءاليا قوجابەكوۆانىڭ تاعى ءبىر بەينەۇندەۋى تارادى، دەپ حابارلايدى Dalanews.kz.
ول العاشقى ۇندەۋلەرى قىزۋ تالقىلانىپ، جەلىگە تاراپ كەتكەننەن كەيىن پرەزيدەنت اكىمشىلىگى، باس پروكۋراتۋرا، قۇقىقتىق ستاتيستيكا جانە ارنايى ەسەپكە الۋ كوميتەتى ونى جۇمىستان قۋۋدى قولعا الۋى مۇمكىن.
– مەملەكەتتىك ورگاندار مەنى قارالاپ، جازعاندارىمدى جالعان ەتىپ كورسەتۋگە تىرىسادى. ءبىراق شىندىقتان باسقا جول جوق. مەن تۇسىنەمىن، الەۋمەتتىك جەلىدە مۇنداي نارسەنى ايتۋ – وزىمە جاۋ تابۋمەن تەڭ. ءبىراق بۇل مەن ءۇشىن ءبىرىنشى رەت ەمەس، – دەيدى ول.
«2024 جىلى بارلىق جاۋاپتى ورگاندارعا بىرنەشە رەت جۇگىندىم»
قوجابەكوۆا 2024 جىلى باس پروكۋرور بەرىك اسىلوۆقا، كوميتەت ءتوراعاسى نۇرلىباي سابيتكە، سونداي-اق پرەزيدەنت اكىمشىلىگىنە بىرنەشە رەت رەسمي تۇردە حات جازىپ، جامبىل وبلىسى بويىنشا دەپارتامەنتتەگى زاڭبۇزۋشىلىقتار تۋرالى مالىمدەگەنىن ايتادى. سونىمەن قاتار ۇقك مەن سىبايلاس جەمقورلىققا قارسى اگەنتتىككە دە رەسمي تۇردە جۇگىنگەن.
– ءبىراق مەنىڭ بارلىق وتىنىشتەرىم تەك سول باياعى كوميتەتكە، ياعني زاڭ بۇزۋشىلىققا قاتىسى بار قۇرىلىمعا قايتارىلىپ وتىر. بۇل ءبىر اينالدىرسا، شىر اينالدىرعان پروبلەما بولدى، – دەيدى پروكۋرور.
ءبىرىنشى فاكت
2022 جىلدىڭ قاراشاسىندا جامبىل وبلىسى بويىنشا دەپارتامەنت قىزمەتكەرى پارا الۋ ۇستىندە ۇستالىپ، تاراز قالالىق سوتى ارقىلى سوتتالعان. ءبىراق دەپارتامەنت باسشىسى سەكەر بۇركىتبايەۆ ەشقانداي جاۋاپكەرشىلىككە تارتىلماعان.
– بۇل قىزمەتكەر ادامداردى «سوتتالعاندىعىڭدى وشىرەم» دەپ الداپ، اقشا العان. ءبىراق باسشىلىققا شارا قولدانىلمادى، – دەيدى قوجابەكوۆا.
ەكىنشى فاكت
2023 جىلى بۇركىتبايەۆ زاڭسىز بۇيرىق شىعارىپ، دەپارتامەنتتىڭ ءبىر قىزمەتكەرىن جۇمىستان شىعارعان. ءبىراق 2024 جىلدىڭ ساۋىرىندە تاراز قالالىق سوتى بۇل بۇيرىقتى زاڭسىز دەپ تانىپ، قىزمەتكەردى قايتادان جۇمىسقا قابىلداتقان. الايدا باسشىلىققا بۇل ءۇشىن دە ەشقانداي شارا قولدانىلماعان.
ءۇشىنشى فاكت
2024 جىلى دەپارتامەنتتەگى ءبىرقاتار قىزمەتكەرلەر – ورىنباسار كالابايەۆ باقىتجان مەن اعا پروكۋرور كەنجەبەكوۆ بەگزات – قىلمىستىق ىستەردى تىركەۋ بويىنشا بازاسىندا زاڭسىز وزگەرتۋلەر ەنگىزگەنى ءۇشىن تارتىپتىك جازا العان. ءبىراق بۇركىتبايەۆ تاعى دا جاۋاپسىز قالدى.
– بۇل فاكتىنى مەن ءوزىم انىقتادىم. ال تەكسەرۋ جۇمىستارى مەنىڭ بىرنەشە رەت حات جازۋىمنان كەيىن عانا قوزعالدى، – دەيدى ول.
«تەكسەرۋ جۇرگىزىلمەي جاتىپ، قورىتىندىسى الدىن الا بەلگىلى بولدى»
پروكۋرور 2025 جىلعى 23 ءساۋىر كۇنى ساعات 18:00-دە eOtinish پورتالى ارقىلى باس پروكۋراتۋرادان رەسمي جاۋاپ العانىن ايتادى. ءبىراق جاۋاپ كوميتەت ءتوراعاسىنىڭ ورىنباسارى قۇسايىنوۆتىڭ قولىمەن بەرىلگەن. ونىڭ ايتۋىنشا، بۇل – سول زاڭبۇزۋشىلىقتار ورىن العان ورگاننىڭ وزىنەن كەلگەن جاۋاپ.
– ءبىراق ءدال سول كۇنى تاڭەرتەڭ، 9:00 شاماسىندا، الەۋمەتتىك جەلىدە «فاكتىلەر راستالمادى» دەگەن جازبا جاريالاندى. سوندا مەنىڭ ءوتىنىشىم قارالماي جاتىپ، ناتيجە الدىن الا بەلگىلى بولعان با؟ بۇل – بۇركىتبايەۆ پەن ونىڭ كومانداسىن اقتاپ الۋدىڭ كەزەكتى امالى، – دەيدى قوجابەكوۆا اشىنىپ.
ونىڭ پىكىرىنشە، بۇل – گەنپروكۋراتۋرا تاراپىنان ەشقانداي شىنايى تەكسەرۋ جۇرگىزىلمەگەنىنىڭ ايقىن دالەلى.
«بۇركىتبايەۆ پەن ونىڭ قولداۋشىلارىن تەكسەرۋدى تالاپ ەتەمىن»
قوجابەكوۆا باس پروكۋراتۋرا مەن انتيكوردان مىنا تۇلعالارعا قاتىستى ناقتى شارا قولدانۋدى سۇرايدى: سەكەر بۇركىتبايەۆ، كالاسپايەۆ، كالابايەۆ، كەنجەبەكوۆ، كەنبايەۆ جانە يزماعامبەتوۆا.
– ەگەر بۇل بازالارداعى وزگەرىستەر قاساقانا جانە تەگىن ەمەس جاسالعان بولسا، بۇل – تارتىپتىك جازا ەمەس، قىلمىستىق جاۋاپكەرشىلىكپەن قارالۋى ءتيىس جاعداي، – دەيدى ول.
قوجابەكوۆا سونداي-اق 2013–2023 جىلدار ارالىعىنداعى سوتقا دەيىنگى تەرگەپ-تەكسەرۋدىڭ ءبىرىڭعاي ءتىزىلىمى جۇيەسىندەگى مالىمەتتەرگە جاسالعان وزگەرىستەردىڭ زاڭدىلىعىن تەكسەرۋدى سۇرايدى. ونىڭ ايتۋىنشا، بۇل زاڭسىز تۇزەتۋلەر جۇيەلى تۇردە، جوسپارلى تۇردە جاسالعان جانە ولاردىڭ ناقتى ۋاقىتى، ورىندالعان قولدانۋشى تۋرالى مالىمەتتەر ساقتالىپ، پروكۋراتۋرا قىزمەتكەرلەرىنە قولجەتىمدى.
– مەن پروكۋراتۋرا قىزمەتكەرىنىڭ وتباسىندا تاربيەلەندىم. اكەم ەرمەك تىكىمباي ۇلى قوجابەكوۆ – ءادىل، ءبىلىمدى، ادال پروكۋرور بولدى. ول ءوزىنىڭ ەڭبەگىمەن "قۇرمەتتى قىزمەتكەر" اتاعىن الدى. مەن وسى رۋحتا، ادىلەتتىلىك پەن ار-نامىستى بارىنەن بيىك قوياتىن تاربيە الدىم. بۇل – مەنىڭ قىزمەتتىك بورىشىم، – دەيدى ءاليا قوجابەكوۆا.
ول زاڭ بۇزۋشىلىقتارعا كىم جول بەرسە دە، ونىمەن كۇرەسۋگە مىندەتتى ەكەنىن اتاپ ءوتتى.
پرەزيدەنتكە اشىق ۇندەۋ: «بارلىق بەينەۇندەۋلەرىمدى جەكە باقىلاۋىڭىزعا الىڭىز»
ءاليا قوجابەكوۆا سوڭعى سوزىندە قازاقستان پرەزيدەنتىنەن بارلىق بەينەۇندەۋلەرىنە جەكە باقىلاۋ ورناتىپ، ءتيىستى شەشىم قابىلداۋدى سۇرادى.
– ەگەر باس پروكۋراتۋرا مەن كوميتەت مەنىڭ حاتتارىمدى ەلەمەيتىن بولسا، مەن پرەزيدەنتكە تەك الەۋمەتتىك جەلى ارقىلى جۇگىنۋگە ءماجبۇرمىن. بۇل – مەنىڭ جالعىز جولىم، – دەپ قورىتىندىلادى ول.
پروكۋراتۋرانىڭ جاۋابى
بۇگىن باس پروكۋراتۋرا بۇل ىسكە قاتىستى جاۋاپ قاتتى.
"باس پروكۋروردىڭ تاپسىرماسى بويىنشا ايتىلعان ۋاجدەردى تەكسەرۋ ءۇشىن جامبىل وبلىسىنا باس پروكۋراتۋرانىڭ ىشكى قاۋىپسىزدىك دەپارتامەنتى مەن ءتيىستى قۇرىلىمدىق بولىمشەسىنىڭ قىزمەتكەرلەرى، سونداي-اق كوميتەت ءتوراعاسىنىڭ ورىنباسارى كىرەتىن جۇمىس توبى جىبەرىلدى"، دەيدى پروكۋرورلار.
