Almatyda qalasyndaǵy Perinatologiia jáne balalar kardiohirýrgiiasy ortalyǵynyń janynan 3 aidan 3 jasqa deiingi erekshe qajettilikteri bar balalarǵa arnalǵan jańa meditsinalyq ońaltý mekemesi – «Qamqorlyq» erte aralasý ortalyǵy ashyldy. Bul bir mekemeniń ashylýy emes, bul – myńdaǵan ata-ananyń úmiti men júzdegen balanyń erteńgi kúnine baǵyttalǵan naqty qadam. Elimizde erekshe kútimdi qajet etetin balalarǵa degen kózqarastyń ózgerip, júieli tásilge bet burǵanynyń aiǵaǵy.
Ortalyqtyń ashylýyna QR Prezidenti janyndaǵy Halyqtyń áleýmettik osal toptarynyń quqyqtary jónindegi ýákil Kenjeǵul Seitjan, Májilis depýtattary, qalalyq densaýlyq saqtaý basqarmasynyń jetekshileri, «Samuryq-Qazyna», «Qazaqstan halqyna» qorlary men «Qamqorlyq» korporativtik qorynyń ókilderi qatysty. Munyń ózi bul bastamanyń tek áleýmettik joba emes, memleket pen qoǵamnyń strategiialyq seriktestigine ainalǵanyn kórsetedi.
Jańa ortalyqtyń negizgi ereksheligi – onyń bir ǵana meditsinalyq baǵytpen shektelmei, densaýlyq saqtaý, bilim berý jáne áleýmettik qorǵaý júieleriniń áleýetin biriktirýi. Bul – tek emdeý ǵana emes, balanyń ómir sapasyn tutastai jaqsartýǵa baǵyttalǵan platforma. Erte aralasý degenimiz – balanyń damýyndaǵy qiyndyqtardy múmkindiginshe erte anyqtap, soǵan sáikes ońaltý sharalaryn bastaý. Dúniejúzilik densaýlyq saqtaý uiymynyń sarapshylary 3-6 ai aralyǵyndaǵy kezeńdi “altyn ýaqyt” dep ataidy. Sebebi dál osy kezeńde bastalǵan ońaltý jumystary múgedektik táýekelin edáýir azaitady.
Ortalyqta barlyq jaǵdai jasalǵan: shýngitti jáne tuzdy bólmeler, sensorlyq orta, immersiialyq vanna, iaǵni balanyń sezimdik jáne motorika júiesin damytýǵa arnalǵan jańa býyn tehnologiialary. Balalarmen nevropatolog, reabilitolog, logoped, psiholog, defektolog, áleýmettik qyzmetker jáne taǵy basqa mamandardan quralǵan mýltidistsiplinarlyq komanda jumys isteidi. Ár bala úshin jeke baǵdarlama jasalady, ol onyń qajettilikterine naqty negizdeledi. Eń bastysy – qyzmettiń bári de mindetti áleýmettik meditsinalyq saqtandyrý aiasynda tegin kórsetiledi.
Statistikaǵa súiensek, búginde Almatyda 676 000-nan astam bala bar, olardyń ishinde 7 460 balada múgedektik tirkelgen. Kóp taralǵan patologiialar – DTsP, sóileý jáne psihomotorlyq damýdyń tejelýi, ortalyq júike júiesiniń zaqymdanýy, tirek-qimyl júiesiniń týa bitken kemistikteri. Jańa ortalyq dál osyndai diagnozy bar búldirshinder men olardyń ata-analary úshin shynaiy kómek alańyna ainalmaq.
Ortalyq jylyna 600 balaǵa deiin qabyldai alady. 21 kúndik kýrs ishinde ata-analar balanyń damýyna qajetti keshendi emdi tek bir jerden ala alady. Bul – tek ońaltý ǵana emes, bolashaqqa bastar kópir. Aita keterligi, munda tek búgingi meditsinalyq kómektermen shektelmeidi. 2022 jyldan beri Perinatologiia ortalyǵynda uryqty qorǵaý ortalyǵy da jumys isteidi. Al 2024 jyldan bastap "Bir kúndik klinika" jobasy arqyly 4 855 júkti áielge hromosomalyq anomaliialarǵa erte skrining júrgizilgen.
Al ortalyqtyń hirýrgiialyq áleýeti de joǵary deńgeide: Qazaqstanda alǵash ret uryq hirýrgiiasy – qursaqishilik operatsiialar júrgizilýde. Qazirge deiin 40-tan astam operatsiia sátti ótip, 30-dan astam náreste ómirge saý bolyp kelgen.
Qala ákimdigi mekemeniń infraqurylymyn jańǵyrtýǵa da erekshe nazar aýdaryp otyr. 2024 jyldyń sońyna deiin emhananyń kúrdeli jóndeýi aiaqtalady. Sonymen qatar 24 myń sharshy metrden astam aýdandy qamtityn jańa jobalar – laminarlyq aǵynmen jabdyqtalǵan operatsiialyq blok, aqyldy operatsiia bólmeleri, angioblokty qaita qurý, gospitaldyq farmatsiia bólimin ashý josparlanǵan. Bul óz kezeginde mekemeniń ótkizý qabiletin arttyryp, invazivti operatsiialar aiasyn keńeitpek.
Bolashaqta bosanǵannan keiingi hirýrgiialyq ortalyq qurylyp, TBA bar nárestelerdiń diagnostikasy, hirýrgiialyq emi jáne ońaltý sharalary bir jerde shoǵyrlanbaq.
Osylaisha, Almatyda bastalǵan «Qamqorlyq» ortalyǵynyń tarihy tek bir mekemeniń sheńberimen shektelmeidi. Bul – áleýmettik saiasattyń jańa paradigmasyna qarai jasalǵan sátti qadam. Bul – tek qazirge emes, bolashaq urpaqtyń densaýlyǵy men áleýetine salynǵan investitsiia. Eń bastysy – munda qur sóz emes, naqty is bar.
