Almatyda avtobýstardyń birinde jolaýshylar arasynda janjal shyqty. Jábirlenýshiniń aıtýynsha, orys tildi áıel oǵan qazaq tilinde sóılegeni úshin aıqaılap, balaǵattap, qorqytqan. İsti baqylaýǵa alǵan zańger Meıirman Shekeev quqyq buzýshynyń ústinen is qozǵalǵanyn málimdedi, dep habarlaıdy Dalanews.kz.

“Birneshe kún buryn avtobýsta bir áıel aıqaılap sóıledi. Men oǵan jaı sóılesýin ótingende, ol aıqaılap balaǵattap, qorqytyp, telefonǵa vıdeoǵa túsire bastady. Sol kezde men de jaǵdaıdy telefonǵa túsirdim”, - deıdi ol.

Dórekilik tanytqan áıel orys tilinde sóılep, jábirlenýshini qorqytyp, ar-namysyna tıetin sózder qoldanǵan.

“Keıin ol maǵan “govorı po‑rýsskı” dep aıqaılaı bastady. Nege men óz elimde qazaqsha sóıleı almaımyn? Qazaqsha sóılesem, oryssha sóıleýimdi talap etti”, - dedi jábirlenýshi.

Oqıǵany baqylaýǵa alǵan zańger Meıirman Shekeev jábirlenýshiniń aryzyna sáıkes áreket jasalǵanyn aıtty.

“Qazirgi tańda jábirlenýshi bizge kómekke júgindi, biz tıisti aryzymyzdy polısıaǵa joldadyq. Sizderdiń qoldaýlaryńyz óte mańyzdy. Sebebi mundaı oqıǵalar kóbine “jabýly qazan” kúıinde qalyp jatady. Qazaqstanda qazaq tili memlekettik til, árbir azamat óz tilinde sóıleýge quqyly. Bul oqıǵa sabaq bolý úshin biz isti sońyna deıin jetkizemiz”, - dep málimdedi ol.

Araǵa uzaq ýaqyt salmaı zańger jaqsy jańalyǵyn jetkizdi.

“Keshegi beınejazbaǵa sizderdiń qoldaýlaryńyz arqasynda Almaty qalasy, Alataý aýdandyq polısıa basqarmasy jedel áreket etip, quqyq buzýshyny anyqtady. Quqyq buzýshynyń ústinen is qozǵalyp, erteń sotqa jiberiledi. Qoldaýlaryńyzǵa myń da bir alǵys!”, - dedi zańger.

Al dórekilik tanytqan áıel óz kinásin moıyndap, qazaq halqynan keshirim surady.

“Men óz kinámdi moıyndaımyn. 12 jeltoqsan kúni 81‑avtobýsta bolǵan janjal úshin keshirim suraımyn. Budan bylaı osyndaı áreket qaıtalanbaıdy. Kelesi joly sózderim men áreketterime abaı bolamyn”, - dep málimdedi ol.