Almatydaǵy jańa BRT jelisinde jol qozǵalysy erejeleri saqtalýyna baqylaý kúsheıtildi, dep habarlaıdy Dalanews.kz.
Almatyda jańa BRT jelisi iske qosyldy, soǵan baılanysty polısıanyń tekserisi kúsheıtildi. Jelini paıdalanýdyń bastapqy kezeńinde negizgi nazar profılaktıkalyq, túsindirý jumystaryna baǵyttalady. Polısıa qyzmetkerleri júrgizýshilerge jol qozǵalysyn uıymdastyrýdaǵy ózgeristerdi túsindirip, jańa jol tańbalary men belgilerge baǵdar berdi, sondaı-aq, qozǵalystyń jańa tártibine beıimdelýge kómektesti.
"Beıimdelý kezeńi aıaqtalǵannan keıin jol qozǵalysy erejelerin buzǵan júrgizýshilerge qatysty ákimshilik yqpal etý sharalary qabyldana bastaıdy. Ásirese, qoǵamdyq kólikke arnalǵan arnaıy jolaqtarda kólikti toqtatý jáne qoıý, sondaı-aq, jeke kólikterdiń BRT jolaǵyna shyǵý deregine erekshe nazar aýdarylady. Quqyqbuzýshylyqtar polısıa narádtarymen qatar foto jáne beınebaqylaý quraldary arqyly da tirkeledi", – dedi Almaty qalasy PD Ákimshilik polısıa basqarmasynyń bastyǵy Serik Shýmaev.
Almaty polısıasy júrgizýshilerdi jol qozǵalysyna jaýapkershilikpen qarap, erejelerdi qatań oryndaýǵa jáne qoǵamdyq kóliktiń qozǵalysyna kedergi keltirmeýge shaqyrdy.
