Novorossiisk portyndaǵy «VPÝ-2» boiynsha intsidentten keiin, Kiev Donald Tramp ákimshiligine KTK qubyrynyń infraqurylymy zardap shekpeidi degen garantiia bergen, deidi DALA INSIDE derekkózi. Endi SBÝ-nyń Qara teńizdegi Novorossiisk baǵytyndaǵy soqqylarynyń barlyǵy KTK infraqurylymyna timeitindei etip jasalýda. Jáne onyń barlyǵyn Shevron alpaýyty arqyly AQSh tikelei baqylap otyr.
«Olar (SBÝ) keshe «Shesharis» munai quiý terminalynyń KTK-ǵa qatysy joq infraqurylymyn jardy. Jáne ony aldyn-ala Vashingtonǵa eskertken. Sebebi Shevronnyń shaǵymynan keiin Kiev tarapy Aq úiden ýltimatým alǵan bolatyn. Eger Shevronnyń Qazaqstandaǵy biznesine nuqsan keletin bolsa, AQSh Ýkrainaǵa kózqarasyn ózgertýi múmkin degen signal berildi. Kiev qazir Pentagon berip otyrǵan spýtniktik barlaý aqparatyna tolyq táýeldi. Prezident Zelenskii birden óz qarýly kúshterine KTK-ǵa tiispeýdi buiyrǵan jáne ol buiryq óz kúshin saqtap tur», - dep habarlady derekkóz.
KTK-nyń eksporttyq qýatynda ózgeris joqtyǵyn Qazaqstan tarapy da rastady. Búgin Qazaqstannyń Energetika ministrligi drondar shabýylynan keiin tutanǵan órt qazaqstandyq munai óndirýshi kásiporyndardyń óndiristik kórsetkishterine áser etpegenin málimdedi. Ol tolyq shyndyqqa janasady.
«Qazaqstan munaiyn óndirý men eksporttaý shtattyq rejimde jalǵasyp jatyr. Qazaqstan munaiyn jetkizýge paidalanylatyn eksporttyq infraqurylym jumysyna qatysty eshqandai irkilis tirkelgen joq. Energetika ministrligi jaǵdaidy infraqurylym operatorlarymen birlesip baqylaýda ustap otyr», — delingen habarlamada.
Keshe Novorossiisk portyn SBÝ drondary shabýyldap, Qara teńizdegi eń iri munai aýdaryp tieý nysandarynyń biri sanalatyn «Shesharis» terminaly órtendi. Osy terminal Reseidiń ońtústigindegi munai logistikasynyń negizgi toraptarynyń biri sanalady. Al ótken jyldyń sońynda, Ýkraina kamikadze kater arqyly nysanaly soqqy jasap, KTK infraqurylymy tizbegindegi sońǵy jáne mańyzdy saty - úsh VPÝ-dyń birin jáne eń qýatty, jumys jasap turǵan VPÝ-2 qurylǵysyn jaryp jibergeni este. Sodan keiin KTK-nyń tankerlerge munai quiý infraqurylymynda tek eki VPÝ ǵana qaldy. Onyń biri, VPÝ-3 kishkentai jáne toqtamai jumys istegen jaǵdaida jylyna 36 million tonna ǵana munaidy tankerge quia alady.
Kaspii qubyr konsortsiýmy VPÝ-1 jáne VPÝ-2 qurylǵylaryn kelesy jyly jańartýdy josparlap otyrǵan. Bul qurylǵylardyń biri Birikken Arab Ámirlikterindegi Drydocks World Dubai keme jóndeý zaýytynan shyǵyp, Qazaqstanǵa bet alǵan bolatyn. Al ekinshisinde býidyń qondyrmasynyń ishine kabel tóseý jáne germetizatsiialaý, liýk qaqpaqtaryn keltirý men dánekerleý jumystary aiaqtaldy. Qazir biz aldyraiyn dep turǵan osy qondyrǵylarǵa abaisyzdan Iran raketasy tiip kete me degen qaýipter joǵary bolyp tur.
