نوۆوروسسييسك پورتىنداعى «ۆپۋ-2» بويىنشا ينسيدەنتتەن كەيىن، كييەۆ دونالد ترامپ اكىمشىلىگىنە كتك قۇبىرىنىڭ ينفراقۇرىلىمى زارداپ شەكپەيدى دەگەن گارانتيا بەرگەن، دەيدى DALA INSIDE دەرەككوزى. ەندى سبۋ-نىڭ قارا تەڭىزدەگى نوۆوروسسييسك باعىتىنداعى سوققىلارىنىڭ بارلىعى كتك ينفراقۇرىلىمىنا تيمەيتىندەي ەتىپ جاسالۋدا. جانە ونىڭ بارلىعىن سhevron الپاۋىتى ارقىلى اقش تىكەلەي باقىلاپ وتىر.

«ولار (سبۋ) كەشە «شەسحاريس» مۇناي قۇيۋ تەرمينالىنىڭ كتك-عا قاتىسى جوق ينفراقۇرىلىمىن جاردى. جانە ونى الدىن-الا ۆاشينگتونعا ەسكەرتكەن. سەبەبى شيەۆروننىڭ شاعىمىنان كەيىن كييەۆ تاراپى اق ۇيدەن ۋلتيماتۋم العان بولاتىن. ەگەر شيەۆروننىڭ قازاقستانداعى بيزنەسىنە نۇقسان كەلەتىن بولسا، اقش ۋكرايناعا كوزقاراسىن وزگەرتۋى مۇمكىن دەگەن سيگنال بەرىلدى. كييەۆ ءقازىر پەنتاگون بەرىپ وتىرعان سپۋتنيكتىك بارلاۋ اقپاراتىنا تولىق تاۋەلدى. پرەزيدەنت زەلەنسكيي بىردەن ءوز قارۋلى كۇشتەرىنە كتك-عا تيىسپەۋدى بۇيىرعان جانە ول بۇيرىق ءوز كۇشىن ساقتاپ تۇر»، - دەپ حابارلادى دەرەككوز.

كتك-نىڭ ەكسپورتتىق قۋاتىندا وزگەرىس جوقتىعىن قازاقستان تاراپى دا راستادى. بۇگىن قازاقستاننىڭ ەنەرگەتيكا مينيسترلىگى دروندار شابۋىلىنان كەيىن تۇتانعان ءورت قازاقستاندىق مۇناي ءوندىرۋشى كاسىپورىنداردىڭ وندىرىستىك كورسەتكىشتەرىنە اسەر ەتپەگەنىن مالىمدەدى. ول تولىق شىندىققا جاناسادى.

«قازاقستان مۇنايىن ءوندىرۋ مەن ەكسپورتتاۋ شتاتتىق رەجيمدە جالعاسىپ جاتىر. قازاقستان مۇنايىن جەتكىزۋگە پايدالانىلاتىن ەكسپورتتىق ينفراقۇرىلىم جۇمىسىنا قاتىستى ەشقانداي ىركىلىس تىركەلگەن جوق. ەنەرگەتيكا مينيسترلىگى جاعدايدى ينفراقۇرىلىم وپەراتورلارىمەن بىرلەسىپ باقىلاۋدا ۇستاپ وتىر»، — دەلىنگەن حابارلامادا.

كەشە نوۆوروسسييسك پورتىن سبۋ دروندارى شابۋىلداپ، قارا تەڭىزدەگى ەڭ ءىرى مۇناي اۋدارىپ تيەۋ نىساندارىنىڭ ءبىرى سانالاتىن «شەسحاريس» تەرمينالى ورتەندى. وسى تەرمينال رەسەيدىڭ وڭتۇستىگىندەگى مۇناي لوگيستيكاسىنىڭ نەگىزگى توراپتارىنىڭ ءبىرى سانالادى. ال وتكەن جىلدىڭ سوڭىندا، ۋكراينا كاميكادزە كاتەر ارقىلى نىسانالى سوققى جاساپ، كتك ينفراقۇرىلىمى تىزبەگىندەگى سوڭعى جانە ماڭىزدى ساتى - ءۇش ۆپۋ-دىڭ ءبىرىن جانە ەڭ قۋاتتى، جۇمىس جاساپ تۇرعان ۆپۋ-2 قۇرىلعىسىن جارىپ جىبەرگەنى ەستە. سودان كەيىن كتك-نىڭ تانكەرلەرگە مۇناي قۇيۋ ينفراقۇرىلىمىندا تەك ەكى ۆپۋ عانا قالدى. ونىڭ ءبىرى، ۆپۋ-3 كىشكەنتاي جانە توقتاماي جۇمىس ىستەگەن جاعدايدا جىلىنا 36 ميلليون توننا عانا مۇنايدى تانكەرگە قۇيا الادى.

كاسپيي قۇبىر كونسورسيۋمى ۆپۋ-1 جانە ۆپۋ-2 قۇرىلعىلارىن كەلەسى جىلى جاڭارتۋدى جوسپارلاپ وتىرعان. بۇل قۇرىلعىلاردىڭ ءبىرى بىرىككەن اراب امىرلىكتەرىندەگى Drydocks World Dubai كەمە جوندەۋ زاۋىتىنان شىعىپ، قازاقستانعا بەت العان بولاتىن. ال ەكىنشىسىندە بۋيدىڭ قوندىرماسىنىڭ ىشىنە كابەل توسەۋ جانە گەرمەتيزاسيالاۋ، ليۋك قاقپاقتارىن كەلتىرۋ مەن دانەكەرلەۋ جۇمىستارى اياقتالدى. ءقازىر ءبىز الدىرايىن دەپ تۇرعان وسى قوندىرعىلارعا ابايسىزدان يران راكەتاسى ءتيىپ كەتە مە دەگەن قاۋىپتەر جوعارى بولىپ تۇر.