Qazaqstannyń Syrtqy ister ministrligi Taiaý Shyǵystaǵy jaǵdaiǵa bailanysty málimdeme jasady, dep habarlaidy Dalanews.kz.
Vedomstvo málimetine súiensek, Qazaqstan Respýblikasy azamattary arasynda zardap shekkender týraly aqparat túspegen.
"Keiingi derekke sáikes shielenis aimaqtarynda Qazaqstan azamattarynyń eń kóp sany myna jerlerde: tanymal týristik baǵyttar, qajylyq saparlar oryndary, sondai-aq, tranzittik habtar shoǵyrlanǵan jerlerde. Sonyń ishinde BAÁ-de shamamen 3 500 adam, Saýd Arabiiasynda shamamen 3 000 adam jáne Qatarda 1 500-ge jýyq adam bar. Diplomatiialyq ókildikter aqparatyna sáikes Iranda 82 Qazaqstan azamaty, Bahreinde 168 azamat, Kýveit pen Iordaniiada árqaisynda 134 azamattan, Izrailde shamamen 100 azamat tirkelgen", - dep jazylǵan habarlamada.
Áskeri is-qimyldar bastalǵannan beri óńir elderiniń basym bóliginde áýe keńistigi jabylǵan. Áýe tasymaldaýshylary reisterdi toqtatýǵa májbúr bolǵandyqtan, Qazaqstannyń shet elderdegi mekemeleri týristik kompaniialarmen birlesip, azamattardy qonaqúilerge ýaqytsha ornalastyryp jatyr.
"BAÁ qonaqúilerinde azamattarǵa jaǵdai turaqtalǵanǵa deiin turýǵa ruqsat berilgen jáne tamaq qamtamasyz etilgen. Shielenis aimaqtarynan qazaqstandyqtardy evakýatsiialaý baǵyttary men sharalary pysyqtalyp jatyr. Qaýipsizdik maqsatynda jergilikti bilik organdary óz betinshe qozǵalmaýǵa keńes berdi. Evakýatsiialyq reis uiymdastyrylǵan jaǵdaida birinshi kezekte qoldaý sharalary halyqtyń neǵurlym osal sanattaryna, qart adamdarǵa, áielder men balalarǵa kórsetiledi. Buǵan deiin Tegeran qalasynan "Zarkýh" kompaniiasynyń ókilderin, Ekonomikalyq yntymaqtastyq uiymynyń qyzmetkerlerin jáne diplomatiialyq ókildik qyzmetkerlerin qosqanda jalpy 50 Qazaqstan azamaty shyǵaryldy", - dep jazylǵan habarlamada.
