Batys Qazaqstan oblysy boıynsha ekologıa departamenti «Qarashyǵanaq Petrolıým Opereıtıng B.V.» kompanıasynyń Qazaqstan fılıalynda shamadan tys shyǵaryndylarǵa qatysty jospardan tys tekserý júrgizdi, dep habarlaıdy Dalanews.kz.
Tekserý nátıjesinde 2024 jyly kompanıa lastaýshy zattardyń shamadan tys shyǵaryndylaryna jáne aǵyndy sýlardyń tógilýine jol bergeni anyqtaldy.
Osy qorytyndylar negizinde kompanıa Qazaqstan Respýblıkasy Ákimshilik quqyq buzýshylyq týraly kodeksiniń 328-babyn buzǵany úshin ákimshilik jaýapkershilikke tartyldy. Salynǵan aıyppuldyń jalpy somasy 2,07 mıllıard teńgeni qurady. Aıyppuldy erikti túrde tóleý merzimi aıaqtalǵan joq.
Sonymen qatar, departament shamadan tys shyǵaryndylar men tógindilerdiń sebepterin taldaý, sondaı-aq bolashaqta osyndaı buzýshylyqtardyń aldyn alýǵa baǵyttalǵan sharalar keshenin ázirleý jáne engizý týraly buıryq shyǵardy.
