Belgili ádebiettanýshy, folklortanýshy ǵalym Seiit Qasqabasov ómirden ótti, - dep habarlaidy Dalanews.kz.
Qaraly habardy Muhtar Áýezov atyndaǵy Ádebiet jáne óner institýty jetkizdi.
"Búgin belgili ádebiettanýshy, folklortanýshy ǵalym, Ulttyq Ǵylym akademiiasynyń akademigi, filologiia ǵylymdarynyń doktory, QR Memlekettik syilyǵynyń laýreaty Seiit Asqaruly Qasqabasov ómirden ótti. Seiit Asqarulynyń otbasyna men jaqyndaryna, qazaq halqyna qaiǵyra kóńil aitamyz!" - dep jazylǵan habarlamada.
Seiit Asqaruly Qasqabasov 1940 jyly 24 maýsymda Semei qalasynda dúniege kelgen. 1947 jyly Semei qalasynyń Jańasemei bóligindegi №5 orta mektepke oqýǵa barady.
- 1970-1981 jyldary Qazaq KSR Ǵylym akademiiasynyń Qoǵamdyq ǵylymdar bólimshesinde ǵylymi hatshysy ári "Qazaq KSR Ǵylym akademiiasynyń Habarlary" atty jýrnalynyń jaýapty hatshysy.
- 1981-1983 jyldary Máskeýdegi KSRO Ǵylym akademiiasynyń M.Gorkii atyndaǵy Álem ádebieti institýtynda aǵa ǵylymi qyzmetker.
- 1983 jyldan bastap Almatydaǵy M.O. Áýezov atyndaǵy ádebiet jáne óner institýtynda aǵa, jetekshi ǵylymi qyzmetker bolyp jumys istegen.
- 1989 jyly Máskeý Memlekettik ýniversitetinde "Qazaq halyq prozasynyń janrlary" degen taqyrypta doktorlyq dissertatsiia qorǵaǵan.
- 1988 jyly Qazaqstan Kompartiiasy Ortalyq Komitetinde konsýltant qyzmetine taǵaiyndalyp, ádebiet jáne óner salasyna jaýapty bolǵan jáne saiasi repressiiaǵa ushyraǵan J.Aimaýytuly, A.Baitursynuly, M.Jumabaev, M.Dýlatuly,t.b. arystarymyzdy aqtaý jumysyna qatysyp, qajet qujattardy daiyndaǵan.
- 1990 jyly Ortalyq Komitette jańadan qurylǵan Saiasi protsester sotsiologiiasy ortalyǵyn basqarǵan. Munda sondai-aq ideologiialyq komissiiasynyń múshesi ári ortalyq jetekshisi retinde kezinde qate qabyldanǵan kóptegen saiasi-partiialyq qujattardyń kúshin joiý jáne jazyqsyz tyiym salynǵan aqyn-jazýshylar men qairatkerlerdi aqtaý qajettigi týraly jumys tobyn basqarǵan.
- 1991-1992 jyldary Qazaqstan Respýblikasynyń Prezidenti men Qazaqstan Respýblikasy Ministrler Kabinetiniń Apparatynda Mádeniet sektorynyń jetekshisi, Bilim, ǵylym jáne sport, jastar isi bóliminiń orynbasary bolǵan.
- 1992 jyly Qazaqstan Respýblikasy Joǵary Attestatsiialyq Komissiiasynyń tóraǵasyna taǵaiyndalyp, JAQ-ty quryp, ǵylymi dárejeler men ǵylymi ataqtardy berýge jáne ǵalymdardy attestatsiialaýǵa qajet erejelerdi jazǵan.
- 1993 jyly TMD elderi Joǵary Attestatsiialyq Komissiialarynyń Assotsiatsiiasyn quryp, onyń tóraǵalyǵyna sailanǵan.
- 1994-1997 jyldary M.O. Áýezov atyndaǵy Ádebiet jáne óner institýtynda institýt direktorynyń orynbasary, Qoljazba jáne tekstologiia bóliminiń meńgerýshisi.
- 1997-2001 jyldary Astana qalasyndaǵy L.N.Gýmilev atyndaǵy Eýraziia ulttyq ýniversitetinde "Eýraziia" ǵylymi ortalyǵyn, shyǵystaný fakýltetin uiymdastyryp, basqarǵan, qazaq folklory men ádebiet tarihy boiynsha dáris oqyǵan.
- 2001-2011 jyldary M.O. Áýezov atyndaǵy Ádebiet jáne óner institýtynyń direktory qyzmetin atqardy.
- 2011 jyldan bastap Institýttyń "Folklortaný" bóliminiń meńgerýshisi jáne bas ǵylymi qyzmetker retinde qyzmet atqardy.
Ol - "Kazahskaia volshebnaia skazka" (1972), "Qazaqtyń halyq prozasy" (1984), "Rodniki iskýsstva" (1986), "Kolybel iskýsstva" (1990), "Kazahskaia neskazochnaia proza" (1992), "Abai jáne folklor" (1995), "Zolotaia jila" (2000), "Janazyq" (2002), "Qozy Kórpesh-Baian Sulý. Qyz Jibek. Qazaqtyń ǵashyqtyq jyrlary" (2003), "XV-XVIII ǵasyrlardaǵy qazaq ádebieti" (2005), "O folklore i ne tolko" (2005), "Elzerde" (2008) siiaqty monografiialar men zertteýler kitabynyń jáne 300-den asa zertteý jumysynyń avtory.
