QR KM Azamattyq aviatsiia komiteti ushý geografiiasyn keńeitý jáne halyqaralyq reister sanyn arttyrý boiynsha jumys júrgizýde. "Air Arabia Abu Dhabi" áýe kompaniiasy Qazaqstanǵa qatynaityn reisterdi iske qosady, dep habarlaidy Dalanews.kz.
Komitettiń málimetinshe, 2025 jyldyń 1 maýsymynan bastap Qazaqstannyń áýe tasymaly naryǵyna BAÁ-niń "Air Arabia Abu Dhabi" jańa áýe kompaniiasy kiredi.
"Áýe kompaniia Abý-Dabi – Almaty baǵyty boiynsha aptasyna úsh reis jiiligimen (seisenbi, juma jáne jeksenbi) tikelei turaqty jolaýshylar reisterin oryndaýdy bastaýdy josparlap otyr", delingen habarlamada.
Qazaqstan men BAÁ arasynda áýe qatynasynyń ashylýy elder arasyndaǵy saýda-ekonomikalyq, iskerlik, investitsiialyq, týristik jáne mádeni yntymaqtastyqty odan ári damytýǵa yqpal etetin bolady.
