Jańa Semei aýdanynyń Shaqaman aýylynda et jáne et ónimderin tereń óńdeitin óndiristik keshenniń qurylysy bastaldy, dep habarlaidy Dalanews.kz
Óńir úshin mańyzdy nysannyń irgetasyn qalaý rásimine oblys ákimi Berik Ýáli, «Eurasia Agro Semey» JShS quryltaishylary aǵaiyndy Sailaý, Erlan Muqashevtar qatysty.
Et jáne et ónimderin tereń óńdeitin óndiristik keshen bir aýysymda 35 tonna et ónimin óńdeýge múmkindik beredi. Munda iri qara, qoi jáne jylqy etin óńdeý arqyly sapaly shujyq, konservilengen ónimder, jartylai fabrikattar men joǵary sanatty et delikatesteri óndiriledi. Bul óndiris teri-bylǵary salasyna qajetti shikizatty usyný arqyly óńirde tolyq óndiristik tizbekti, iaǵni óndiristiń ekojúiesin qalyptastyrady. Sonymen qatar qaldyqsyz tehnologiialardy qoldaný arqyly ekologiialyq talaptarǵa tolyq sáikes keledi.
«Eurasia Agro Semey» jaýapkershiligi shekteýli seriktestigi júzege asyratyn, Avstraliia jáne Eýropanyń zamanaýi tehnologiiasymen jabdyqtalatyn et kombinaty jobasynyń quny 7,7 mlrd teńgeni quraidy. Joba iske asqanda 1000 adam turaqty jumyspen qamtylady.
Joba boiynsha 7 myń bas usaq malǵa arnalǵan bordaqylaý alańy daiyndalǵan. Qazir 10 myń bas iri qaraǵa arnalǵan alań salý úshin jobalaý jumystary júrgizilýde.
Atalǵan joba Abai oblysyn 2027 jylǵa deiin damytý josparyna engizilip, óńirlik jáne ulttyq deńgeide basymdyqqa ie joba retinde tanyldy. Memleket basshysy bul bastamany 2025 jyldyń aqpan aiynda ótken jumysshy mamandyqtarynyń kórmesinde jeke atap ótip, jobanyń mańyzdylyǵyna nazar aýdardy. Sondai-aq Prezident Ákimshiligi tarapynan turaqty baqylaýǵa alynyp, iske asyrylýyna qoldaý kórsetilip otyr.
Oblys ákimi mundai aýqymdy investitsiialyq jobanyń óńir úshin mańyzy zor ekenin atap ótti.
«Prezidentimiz Qasym-Jomart Kemeluly Toqaev Aýyl sharýashylyǵy eńbekkerleriniń birinshi forýmynda «Agroónerkásip keshenin indýstriialandyrýdy belsendi túrde jalǵastyrý qajet» dep atap ótken bolatyn. Bul keshen – tek óndiris qana emes, mal sharýashylyǵyn júieli damytýdyń, bordaqylaý alańdaryn keńeitýdiń, jańa jumys oryndaryn ashýdyń jáne eldi mekendenderdiń áleýetin arttyrýdyń naqty úlgisi. Qazirgi tańda óńirdegi mal sharýashylyǵymen ainalysatyn azamattar ósirgen malyn, teri ónimderin laiyqty baǵada ótkize almai júr. Bul aýyl eńbekkerlerine naqty kómek bolmaq.
Sonymen qatar Abai oblysyna ǵana emes, kórshi Shyǵys Qazaqstan, Pavlodar, Qaraǵandy oblystarynyń sharýalaryna da úlken qoldaý bolady dep oilaimyn. Óndiristik keshendi kezinde shet memleketterge deiin óz ónimin eksporttaǵan Semei et kombinatynyń qaita jańǵyrýy, zańdy jalǵasy deýge bolady.
Osyndai naqty jobalardy iske asyrýdyń nátijesinde sheteldik jáne otandyq iri investorlardyń aimaǵymyzǵa degen qyzyǵýshylyǵyn arttyra alamyz. Mundai jobalar olardyń oblys agroónerkásip keshenine qomaqty qarjy salýyna senimdi negiz bolady. Búgingi rásim – óndiristik damýǵa basqan simvoldyq máni zor alǵashqy qadam. Atalǵan jobanyń halyq igiligine qyzmet etip, óńirdiń damýyna serpin beretinine senimimiz mol», - dedi aimaq basshysy.
Óndiristik keshendi 2026 jyly tamyz aiynda iske qosý josparlanyp otyr.
