TikTok jelisinde Erjan esimdi qoldanýshy Memleket basshysy Qasym-Jomart Toqaevqa vıdeoúndeý jarıalady, dep habarlaıdy Dalanews.kz.

Ózin Almaty oblysy Raıymbek aýdany Uzaq aýyldyq okrýginiń turǵyny Moldahmetov Erjan Názikenuly retinde tanystyrǵan azamat kópbalaly analarǵa tólenetin tólem kólemine qatysty másele kóterdi.

“Qurmetti Prezıdent myrza! Siz taý basynda otyryp saı-salany kórmeısiz. “Aspannan shuǵa jaýsa, qulǵa ultaraq ta joq” degen qazaqta uly sóz bar edi. Búgingi tańda 1973 jylǵy 14 qańtarda dúnıege kelgen áıelim alty balamen, “Kúmis medalmen” nebári 5 176 teńge zeınetaqyǵa shyqty”, - deıdi ol.

Vıdeo avtory bul somanyń jetkiliksiz ekenin aıtyp, áleýmettik tólemder kólemin qaıta qaraýdy surady.

“Bizde, Qazaqstanda, qańǵybas ıtterge aıyna 20 myń teńge aqsha bóledi eken. Sondaı-aq bir sottalýshyǵa kúnine 7 500 teńge qarajat jumsalady. Iaǵnı elimizdegi 30 myń sottalýshyǵa táýligine 225 mıllıon teńge ketedi. Al endi osyndaı kópbalaly analarǵa bólinip jatqan 5 176 teńge zeınetaqyǵa ne keledi? Bizde bir qap un 12 myń teńge turady. Endi ony satyp alý úshin eki aı zeınetaqyny kútý kerek pe? Osyndaı zańdardy kim, qaı jerimen oılap shyǵaryp jatyr?”, - dep shúılikti ol.

Erjan óz úndeýinde depýtattardy halyqtyń muń-muqtajyna jaqyn bolýǵa shaqyryp, kópbalaly analardy qoldaý sharalaryn kúsheıtýdi ótindi. Sondaı-aq ol aýyldaǵy turmys aýyr ekenin, eldi mekenge áli gaz tartylmaǵanyn, turǵyndar kómir jaǵyp otyrǵanyn atap ótti.

“Bizdiń depýtattar - Ardaq Nazarov, Janarbek Áshimjan jáne Janbolat Jórgenbaev - sizder halyqtyń muń-muqtajyn jetkizetin, eldiń ishinde, elmen birge bolýlaryńyz kerek edi. Al búgingi tańda sizder men halyqtyń arasyndaǵy alshaqtyq ulǵaıyp bara jatyr. Óıtkeni sizderdiń qaryndaryńyz toıyp qalǵan bolý kerek.

Qazirgi tańda aýyldyń turmys-tirshiliginiń aýyrlyǵy sonshalyqty, bizge áli gaz kelgen joq, áli de kómir jaǵyp, kúl shyǵaramyz. Sol sıaqty áıel adamdardyń istep jatqan jumystary óte aýyr.

Osyny eskere otyryp, osy zańdardy qaıtadan qarastyryp, qazaq áıelderine degen qoldaýdy kúsheıtýlerińizdi suraımyn. “El bolamyn deseń - besigińdi túze” deıdi. Altyn qursaqty analardyń búgin qadiri bolmaı turǵany ókinishti”, - dedi Erjan.

Ol memlekette analardyń jaǵdaıyna qarap, elge janashyrlyq tanytatyn adam tabylmaı otyrǵanyn aıtyp qynjyldy.

“5 176 teńge alǵannan keıin qazaq analary jas urpaqty qalaı kóbeıtedi? “Bolsań - ol bol, qaqyń joq uıyqtap jatqan sábıdi terbetýge…”, - dep sózin túıindedi.

Qazirgi ýaqytta resmı organdar bul úndeýge qatysty pikir bildirgen joq.