Almatyda alqabilerdiń qatysýymen ótken sotta tórt turǵyn iri kólemde bopsalaý jasaǵany úshin 9 jylǵa bas bostandyǵynan aiyryldy, dep habarlaidy Dala News.
Mamandandyrylǵan aýdanaralyq qylmystyq sotta qaralǵan is materialdaryna sáikes, 2025 jylǵy 20–22 qańtar aralyǵynda aiyptalýshylar aldyn ala sóz bailasyp áreket etken. Olar jábirlenýshini onyń abyroiyna nuqsan keltirýi múmkin málimetterdi taratamyz dep qorqytyp, 20 mln jáne 23 mln teńge kólemindegi qaryzdy óndirip alýdan bas tartýdy talap etken. Sonymen qatar 18 mln teńge qolma-qol aqsha berýdi suraǵan.
Tergeý nusqasynda bul áreketter Qylmystyq kodekstiń 194-baby 4-bóligi 2-tarmaǵy boiynsha saralanǵan. Atalǵan bap 7 jyldan 15 jylǵa deiin bas bostandyǵynan aiyrý jáne múlikti tárkileý jazasyn qarastyrady.
Prokýror sottan árqaisysyna 10 jyl jaza taǵaiyndaýdy suraǵan. Aiyptalýshylar kinálaryn moiyndamai, aqtaýdy talap etti. Jábirlenýshiler naqty merzim berýdi surady.
Alqabilerdiń verdiktimen D., K., R. jáne A. kináli dep tanylyp, árqaisysy 9 jylǵa sottaldy. Sot jaza belgileý kezinde olardyń kámeletke tolmaǵan balalary baryn jeńildetetin mán-jai retinde eskerdi. Aýyrlatatyn jaǵdailar anyqtalmaǵan.
Sonymen qatar aiyptalýshylardyń birine politsiia qyzmetkerinen 40 myń teńge bopsalady degen aiyp taǵylǵan edi. Bul epizod boiynsha sot ony aqtady.
Úkim ázirge zańdy kúshine engen joq.
