الماتىدا القابيلەردىڭ قاتىسۋىمەن وتكەن سوتتا ءتورت تۇرعىن ءىرى كولەمدە بوپسالاۋ جاساعانى ءۇشىن 9 جىلعا باس بوستاندىعىنان ايىرىلدى، دەپ حابارلايدى Dala News.
مامانداندىرىلعان اۋدانارالىق قىلمىستىق سوتتا قارالعان ءىس ماتەريالدارىنا سايكەس، 2025 جىلعى 20–22 قاڭتار ارالىعىندا ايىپتالۋشىلار الدىن الا ءسوز بايلاسىپ ارەكەت ەتكەن. ولار جابىرلەنۋشىنى ونىڭ ابىرويىنا نۇقسان كەلتىرۋى مۇمكىن مالىمەتتەردى تاراتامىز دەپ قورقىتىپ، 20 ملن جانە 23 ملن تەڭگە كولەمىندەگى قارىزدى ءوندىرىپ الۋدان باس تارتۋدى تالاپ ەتكەن. سونىمەن قاتار 18 ملن تەڭگە قولما-قول اقشا بەرۋدى سۇراعان.
تەرگەۋ نۇسقاسىندا بۇل ارەكەتتەر قىلمىستىق كودەكستىڭ 194-بابى 4-بولىگى 2-تارماعى بويىنشا سارالانعان. اتالعان باپ 7 جىلدان 15 جىلعا دەيىن باس بوستاندىعىنان ايىرۋ جانە مۇلىكتى تاركىلەۋ جازاسىن قاراستىرادى.
پروكۋرور سوتتان ءارقايسىسىنا 10 جىل جازا تاعايىنداۋدى سۇراعان. ايىپتالۋشىلار كىنالارىن مويىنداماي، اقتاۋدى تالاپ ەتتى. جابىرلەنۋشىلەر ناقتى مەرزىم بەرۋدى سۇرادى.
القابيلەردىڭ ۆەرديكتىمەن د.، ك.، ر. جانە ا. كىنالى دەپ تانىلىپ، ءارقايسىسى 9 جىلعا سوتتالدى. سوت جازا بەلگىلەۋ كەزىندە ولاردىڭ كامەلەتكە تولماعان بالالارى بارىن جەڭىلدەتەتىن ءمان-جاي رەتىندە ەسكەردى. اۋىرلاتاتىن جاعدايلار انىقتالماعان.
سونىمەن قاتار ايىپتالۋشىلاردىڭ بىرىنە پوليسيا قىزمەتكەرىنەن 40 مىڭ تەڭگە بوپسالادى دەگەن ايىپ تاعىلعان ەدى. بۇل ەپيزود بويىنشا سوت ونى اقتادى.
ۇكىم ازىرگە زاڭدى كۇشىنە ەنگەن جوق.
