Almatynyń irgesindegi Ile Alataýy memlekettik ulttyq tabiǵi parkine 30 jyl toldy, dep habarlaidy Dalanews.kz.
1996 jyly 164 450 gektar aýmaqpen qurylǵan park búginde 200 160 gektarǵa deiin keńeiip, erekshe qorǵalatyn tabiǵi aýmaq 35 710 gektarǵa ulǵaidy. Bul – tabiǵi ekojúieni saqtaý men bioalýantúrlilikti qorǵaýǵa baǵyttalǵan júieli memlekettik jumystyń nátijesi.
Úsh onjyldyq ishinde ulttyq park aýmaǵynda 1637 gektar jerge 5 010 000 aǵash kósheti otyrǵyzyldy. Ormandy qalpyna keltirý jumystary 7 pitomniktiń turaqty qyzmetimen qamtamasyz etilip otyr. Orman qory órt qaýiptiliginiń 3 klasyna jatatyndyqtan, park aýmaǵynda 4 orman órt sóndirý stantsiiasy jumys isteidi, 41 jaýynger kezekshilik atqarady. Myńdaǵan shaqyrym órtke qarsy joldar jóndelip, aldyn alý sharalary kúsheitilgen.
30 jyl ishinde park tek tabiǵatty qorǵaýmen shektelmei, týrizmniń de draiverine ainaldy. 1996 jyly nebári 27,4 myń adam kelse, 2025 jyly kelýshiler sany 945,9 myńǵa jetti. Týristik marshrýttar sany 8-den 46-ǵa deiin ósti. Úlken Almaty kóli, Túrgen sarqyramalary, Esik kóli, Býtakovka shatqaly siiaqty baǵyttar jyl saiyn myńdaǵan týristi qabyldaidy. Biyl taǵy birneshe jańa soqpaq pen vizit-ortalyq iske qosylyp, aldaǵy úsh jylda 30 jańa marshrýt ashý josparlanyp otyr.
Ǵylym men janýarlar dúniesin qorǵaý baǵytynda da naqty nátijeler bar. 1996 jyly 5–10 daraq qana tirkelgen ilbis sany búginde 39-ǵa jetti. Qońyr aiý 85-ke, tas sýsary 493-ke, búrkit 97 daraqqa deiin kóbeigen. Park aýmaǵynda 2 genetikalyq rezervat qurylyp, Sivers almasynyń klon muraǵaty saqtalýda. 2024 jyly ulttyq parkter arasynda alǵash ret in-vitro zerthanasy ashylyp, sirek ósimdikterdi jasandy ortada kóbeitý bastaldy.
Ekologiialyq mádenietti qalyptastyrý da basty basymdyqqa ainalǵan. 1996–2025 jyldary 3211 ekologiialyq is-shara ótkizilip, 2 mln-nan astam erikti men ekobelsendi qamtylǵan. Sonymen qatar investitsiialyq jobalar sany 1-den 94-ke deiin ósti. Qazir park aýmaǵynda 3 shańǵy kýrorty, 5 vizit-ortalyq jáne birneshe zamanaýi demalys nysandary jumys isteidi.
Ile Alataýy – 30 jylda jai ǵana qorǵalatyn aýmaq emes, tabiǵi murany saqtaýdyń, týrizmdi damytýdyń jáne ǵylymi izdenisterdi júieleýdiń ulttyq modeline ainaldy.
