Bıyl Sý resýrstary jáne ırrıgasıa mınıstrligi «Qazsýshar» RMK qaraýyndaǵy qaıta jańǵyrtylǵan 86 sýarý arnasyn sıfrlandyrý jumystaryn bastaıdy, dep habarlaıdy Dala News.
Joba aıasynda mehanıkalyq gıdrotosqaýyldar avtomattandyrylyp, sý kólemi men deńgeıin esepteıtin qurylǵylar ornatylady. Nátıjesinde 502 shaqyrymnan astam sýarý jelisi sıfrlyq formatqa kóshiriledi.
Vıse-mınıstr Aslan Ábdiraımovtyń aıtýynsha, bul – ırrıgasıalyq júıelerdi jańǵyrtý baǵytyndaǵy jalǵyz joba emes.
«Bıyl Islam damý bankiniń qoldaýymen ońtústik óńirlerdegi 103 arnada jumys bastalady. Sonyń nátıjesinde 2027 jylǵa deıin 900 shaqyrymnan astam kanal jańǵyrtylady. Sonymen qatar 2026 jyldyń birinshi jartyjyldyǵynda taǵy 263 arnany rekonstrýksıalaý jáne avtomattandyrý boıynsha jobalyq-smetalyq qujattama ázirleý aıaqtalady», – dedi ol.
Mınıstrlik málimetinshe, ırrıgasıalyq ınfraqurylymdy sıfrlandyrý sý resýrstaryn tıimdi basqarýǵa, sý ysyrabyn azaıtýǵa jáne aýyl sharýashylyǵy salasynyń turaqty damýyna múmkindik beredi.
