Eýropalyq barlaý qyzmetteri 2026 jyly Resei men Ýkraina arasynda beibit kelisim bolady degenge senbeidi. Bul týraly joǵary laýazymdy barlaýshylarǵa silteme jasaǵan Reuters jazdy, dep habarlaidy Dalanews.kz.
Reuters-pen sóilesken bes derekkózdiń barlyǵy Resei soǵysty tez aiaqtaýǵa múddeli emes dep esepteidi. Olardyń tórteýiniń aitýynsha, Máskeý AQSh-pen kelissózderdi sanktsiialardy alyp tastaý jáne iskerlik kelisimder jasaý úshin paidalanýǵa tyrysyp otyr. Jenevada ótken kelissózderdi derekkózderdiń biri «qoiylymǵa uqsas spektakl» dep ataǵan.
Bir derekkózdiń aitýynsha, Reseidiń maqsaty ózgermegen. Máskeý Vladimir Zelenskii bilikten ketip, Ýkrainany Resei men Batys arasyndaǵy beitarap «býferlik aimaqqa» ainaldyrýdy kózdeidi.
Keibir barlaý ókilderiniń pikirinshe, Donetsk oblysynyń Resei basyp ala almaǵan bóligin berý arqyly aýmaqtyq talaptardy ishinara qanaǵattandyrýǵa bolady. Alaida bul Kremldiń Zelenskii biligin qulatý maqsatyn oryndamaidy. Al úshinshi derekkóz mundai aýmaqtyq ymyra soǵystyń aiaqtalýyna áser etedi deý qate ekenin aitty: onyń sózinshe, bul tek kelissózderdiń bastalýyna jol ashýy múmkin, biraq keiin Máskeý jańa talaptar qoiady.
Eki derekkóz Resei kelissózderdi eki baǵytqa bólýge tyrysyp jatqanyn aitty: birinshisi soǵysty toqtatý, ekinshisi Resei men AQSh arasyndaǵy ekijaqty kelisimder, sonyń ishinde sanktsiialardy alyp tastaý. Buǵan deiin Zelenskii Reseidiń AQSh-qa aýqymdy ekonomikalyq mámile usynǵanyn málimdegen.
Reuters derekkózderiniń biriniń baǵalaýynsha, 2026 jyldyń ekinshi jartysynda Resei qarjylyq táýekelderge tap bolýy múmkin. Buǵan sanktsiialar saldarynan kapital naryǵyna qoljetimdiliktiń shektelýi jáne qaryz alý qunynyń joǵary bolýy sebep. Degenmen basqa bir derekkóz Resei qoǵamy qiyndyqtarǵa tótep bere alatyn «tózimdi» ekenin aitty.
