Almatyda Eksporttaýshylardyń jyl saiynǵy forýmy ótip jatyr, dep habarlaidy Dalanews.kz.
Onda biznes ókilderi men memlekettik organdar shikizattyq emes eksportty damytý jáne qazaqstandyq ónimderdiń shetel naryǵyndaǵy úlesin arttyrý máselelerin talqylaýda.
QazTrade bas direktory Aitmuhammed Aldajarov forým taqyryby Memleket basshysy qoiǵan mindettermen tikelei bailanysty ekenin aitty.
«Forýmnyń taqyryby Memleket basshysy qoiǵan mindettermen tikelei bailanysty. Áńgime shikizattyq modelden óńdelgen ónim shyǵarýǵa kóshý jáne joǵary qosylǵan quny bar taýarlardyń úlesin arttyrý týraly bolyp otyr. Biz salalyq taldaý júrgizip jatyrmyz jáne ónerkásiptik ónim eksportyna qyzyǵýshylyqtyń turaqty ósýin kórip otyrmyz», – dedi ol.
Onyń aitýynsha, qazir basty nazar syrtqy naryqtarǵa shikizat emes, básekege qabiletti daiyn ónimmen shyǵatyn kompaniialardyń naqty tájiribesine aýdarylyp otyr.
Mysal retinde temirjol ónimderin eksporttaý jobasy keltirildi. Qazaqstandyq kásiporyndar relstik bekitpeler men temirbeton shpaldaryn Ortalyq Aziia elderine jáne Resei Federatsiiasyna jetkizýde. Sonymen qatar satý geografiiasyn keńeitý boiynsha kelissózder júrgizilýde. QazTrade arqyly Pákistan naryǵyna shyǵý múmkindigi pysyqtalyp jatyr.
«BENT» firmasynyń prezidenti Dinmuhammed Kýziev relstik bekitpeler tolyq jinaq kúiinde negizgi eksporttyq baǵyttardyń biri bolyp otyrǵanyn atap ótti.
«Biz Ortalyq Aziiadaǵy tolyq jinaqtaǵy relstik bekitpelerdi óndiretin jalǵyz kásiporynbyz. Saýda jáne integratsiia ministrligi men QazTrade qoldaýymen Qyrǵyzstan men Ózbekstanǵa jetkizilim jolǵa qoiyldy, sondai-aq Resei Federatsiiasyna eksport bastaldy. Ótken jyly saýda-ekonomikalyq missiialar aiasynda Iran men Túrikmenstanǵa bardyq, qazir belsendi kelissózder júrgizip jatyrmyz. 2025 jyldyń qorytyndysy boiynsha eksport kólemi shamamen 5 mln dollardy qurady. 2026 jyly ony 8 mln dollarǵa deiin arttyrýdy maqsat etip otyrmyz», – dedi ol.
QazTrade málimetinshe, mundai jobalar joǵary qosylǵan quny bar ónim eksportynyń ósip kele jatqanyn kórsetedi. Ortalyq kásiporyndardy syrtqy naryqtarǵa shyǵarý barysynda saýda missiialaryn uiymdastyrýdan bastap kelissózder júrgizý men kelisimsharttarǵa qol qoiýǵa deiin keshendi qoldaý kórsetýdi jalǵastyrýda.
