الماتىدا ەكسپورتتاۋشىلاردىڭ جىل سايىنعى فورۋمى ءوتىپ جاتىر، دەپ حابارلايدى Dalanews.kz.
وندا بيزنەس وكىلدەرى مەن مەملەكەتتىك ورگاندار شيكىزاتتىق ەمەس ەكسپورتتى دامىتۋ جانە قازاقستاندىق ونىمدەردىڭ شەتەل نارىعىنداعى ۇلەسىن ارتتىرۋ ماسەلەلەرىن تالقىلاۋدا.
QazTrade باس ديرەكتورى ايتمۇحاممەد الداجاروۆ فورۋم تاقىرىبى مەملەكەت باسشىسى قويعان مىندەتتەرمەن تىكەلەي بايلانىستى ەكەنىن ايتتى.
«فورۋمنىڭ تاقىرىبى مەملەكەت باسشىسى قويعان مىندەتتەرمەن تىكەلەي بايلانىستى. اڭگىمە شيكىزاتتىق مودەلدەن وڭدەلگەن ءونىم شىعارۋعا كوشۋ جانە جوعارى قوسىلعان قۇنى بار تاۋارلاردىڭ ۇلەسىن ارتتىرۋ تۋرالى بولىپ وتىر. ءبىز سالالىق تالداۋ جۇرگىزىپ جاتىرمىز جانە ونەركاسىپتىك ءونىم ەكسپورتىنا قىزىعۋشىلىقتىڭ تۇراقتى ءوسۋىن كورىپ وتىرمىز»، – دەدى ول.
ونىڭ ايتۋىنشا، ءقازىر باستى نازار سىرتقى نارىقتارعا شيكىزات ەمەس، باسەكەگە قابىلەتتى دايىن ونىممەن شىعاتىن كومپانيالاردىڭ ناقتى تاجىريبەسىنە اۋدارىلىپ وتىر.
مىسال رەتىندە تەمىرجول ونىمدەرىن ەكسپورتتاۋ جوباسى كەلتىرىلدى. قازاقستاندىق كاسىپورىندار رەلستىك بەكىتپەلەر مەن تەمىربەتون شپالدارىن ورتالىق ازيا ەلدەرىنە جانە رەسەي فەدەراسياسىنا جەتكىزۋدە. سونىمەن قاتار ساتۋ گەوگرافياسىن كەڭەيتۋ بويىنشا كەلىسسوزدەر جۇرگىزىلۋدە. QazTrade ارقىلى پاكىستان نارىعىنا شىعۋ مۇمكىندىگى پىسىقتالىپ جاتىر.
«بەنت» فيرماسىنىڭ پرەزيدەنتى دىنمۇحاممەد كۋزييەۆ رەلستىك بەكىتپەلەر تولىق جيناق كۇيىندە نەگىزگى ەكسپورتتىق باعىتتاردىڭ ءبىرى بولىپ وتىرعانىن اتاپ ءوتتى.
«ءبىز ورتالىق ازياداعى تولىق جيناقتاعى رەلستىك بەكىتپەلەردى وندىرەتىن جالعىز كاسىپورىنبىز. ساۋدا جانە ينتەگراسيا مينيسترلىگى مەن QazTrade قولداۋىمەن قىرعىزستان مەن وزبەكستانعا جەتكىزىلىم جولعا قويىلدى، سونداي-اق رەسەي فەدەراسياسىنا ەكسپورت باستالدى. وتكەن جىلى ساۋدا-ەكونوميكالىق ميسسيالار اياسىندا يران مەن تۇرىكمەنستانعا باردىق، ءقازىر بەلسەندى كەلىسسوزدەر جۇرگىزىپ جاتىرمىز. 2025 جىلدىڭ قورىتىندىسى بويىنشا ەكسپورت كولەمى شامامەن 5 ملن دوللاردى قۇرادى. 2026 جىلى ونى 8 ملن دوللارعا دەيىن ارتتىرۋدى ماقسات ەتىپ وتىرمىز»، – دەدى ول.
QazTrade مالىمەتىنشە، مۇنداي جوبالار جوعارى قوسىلعان قۇنى بار ءونىم ەكسپورتىنىڭ ءوسىپ كەلە جاتقانىن كورسەتەدى. ورتالىق كاسىپورىنداردى سىرتقى نارىقتارعا شىعارۋ بارىسىندا ساۋدا ميسسيالارىن ۇيىمداستىرۋدان باستاپ كەلىسسوزدەر جۇرگىزۋ مەن كەلىسىمشارتتارعا قول قويۋعا دەيىن كەشەندى قولداۋ كورسەتۋدى جالعاستىرۋدا.
