Almatyda burynǵy ákim Baýyrjan Baibek basqarǵan kezeńge qatysty daýly qurylys isi qaitadan kún tártibine shyqty, dep habarlaidy Dala News.
Halyqaralyq «Suńqar» shańǵy kesheniniń qurylysyna qatysqan merdigerler kópjyldyq qaryz daýy men tekserýdiń barysyn bilý úshin prokýratýraǵa barǵan. Alaida olar kútken túsindirýdiń ornyna politsiia shaqyrylǵan.
TOO «TOL-Qurylys» direktorynyń orynbasary Abdýrazaq Baibolatov ustalyp, «ruqsat etilmegen piket» uiymdastyrdy degen aiyppen ákimshilik jaýapkershilikke tartyldy. Oǵan 50 AEK kóleminde aiyppul salyndy.
Eske salsaq, buǵan deiin qurylysshylar «Suńqar» kesheni boiynsha shamamen 6 mlrd teńge qaryz bar ekenin málimdep, istiń tergelýi sozylyp ketkenin aitqan. Olar bul kezeńde qala ákimdigin basqarǵan tulǵalardyń áreketine qatysty suraqtar bar ekenin ashyq kótergen.
Daýly joba men qaryz máselesi birneshe jyldan beri sheshimin tappai keledi. Qurylysshylar isti jan-jaqty ári ashyq tergeýdi talap etip otyr.
