Búgin Premer-Ministrdiń birinshi orynbasary Roman Skliardyń tóraǵalyǵymen Ekologiia jáne tabiǵi resýrstar ministrliginiń alqa májilisi ótti, dep habarlaidy Dala News.
Jiynda 2025 jylǵy jumystyń qorytyndylary shyǵarylyp, 2026 jylǵa arnalǵan negizgi mindetter aiqyndaldy. Alqa otyrysyna Parlament depýtattary, Prezident Ákimshiligi men Úkimet Apparatynyń ókilderi, ortalyq jáne jergilikti atqarýshy organdar, kvazimemlekettik sektor, aýmaqtyq bólimsheler jáne Qoǵamdyq keńes músheleri qatysty.
Ekologiia ministri Erlan Nysanbaev qorshaǵan ortany qorǵaý, tabiǵi resýrstardy utymdy paidalaný jáne molyqtyrý baǵytyndaǵy negizgi nátijelerdi baiandady. Vitse-ministrler jetekshilik etetin salalar boiynsha egjei-tegjeili esep berdi.
Roman Skliar óz sózinde alqa otyrysy jańa Konstitýtsiia jónindegi respýblikalyq referendým qarsańynda ótip jatqanyn atap ótti.
«Konstitýtsiia jobasynyń usynylǵan redaktsiiasynda qoǵamnyń basty suranystarynyń biri – adam ómiri men densaýlyǵy úshin qolaily orta qurý, tabiǵatqa uqypty qaraý irgeli qaǵidat retinde engizildi», – dedi ol.
Qazirgi ýaqytta ministrlik qorshaǵan ortanyń jai-kúiin baqylaý, qaldyqtardy basqarý, shyǵaryndylardy monitoringileý, orman órtterin erte anyqtaý, orman resýrstaryn esepke alý jáne ulttyq parkterge barýdy baqylaý boiynsha tsifrlyq jobalardy iske asyryp jatyr. Orman órtterin erte anyqtaý júiesi 2025 jyly 2,2 mln gektar aýmaqty qamtydy. Júiege jasandy intellekt engizilip, derekter jedel basqarý ortalyǵyna birden jiberiledi. Jyl sońyna deiin eń janǵysh ormandardyń 5,4 mln gektary tolyq qamtylmaq.
Ministrlik úshin mańyzdy mindetterdiń biri – jeke investitsiialardy tarta otyryp, qaldyqtardy basqarý júiesin damytý. Sonymen qatar 2 mlrd aǵash otyrǵyzý jáne orman alqabyn 14,5 mln gektarǵa jetkizý jumystary jalǵasýda.
Oń kórsetkishterge qaramastan, jerdiń degradatsiiasy men shóleittený máselesi ózekti kúiinde qalyp otyr. Bul baǵytta jel eroziiasyn azaitý, qumdy bekitý jáne jaiylymdardy qalpyna keltirý úshin qorǵanys orman beldeýleri qurylmaq.
Jiyn barysynda 2026 jylǵa arnalǵan mindetter belgilenip, ekologiialyq qaýipsizdikti kúsheitý, bioártúrlilikti saqtaý jáne joǵary ekologiialyq mádenietti qalyptastyrý boiynsha naqty tapsyrmalar berildi.
