Qazaqstannyń Úzdiksiz Bilim berý qaýymdastyǵy mektepke deiingi uiymdardy vaýcherlik qarjylandyrýǵa kóshirý jónindegi pilottyq jobaǵa qatysty alańdaýshylyq bildirdi. Uiym ókilderiniń pikirinshe, bastama resmi túrde tsifrlandyrý men ashyqtyqty arttyrýdy kózdegenimen, qoldanysta jekemenshik balabaqshalar úshin aitarlyqtai táýekelder týyndatýy múmkin, dep habarlaidy Dalanews.kz.
"Jańa model boiynsha óńirde memlekettik balabaqshalarda bos oryn bolsa, jekemenshik uiymdarǵa memlekettik tapsyrys múlde berilmeýi múmkin. Sonymen birge kez kelgen formaldy sáikessizdik qarjylandyrýdan bas tartýǵa negiz bolýy yqtimal", - dep atap ótti qaýymdastyq ókilderi.
Qaýymdastyq tsifrlyq júielerge tolyq táýeldilik te qosymsha qaýip tóndiretinin jetkizdi.
"Derekqordaǵy kez kelgen tehnikalyq qate tólemderdiń buǵattalýyna ákelýi yqtimal", - dep málimdedi uiym.
Sonymen birge qaýymdastyq zańnamada kózdelmegen talaptardyń qoiyla bastaǵanyna erekshe nazar aýdardy. Atap aitqanda, keibir balabaqshalardan sanitariialyq-epidemiologiialyq qorytyndyny belgili bir merzim saiyn "jańartý" talap etilip otyrǵany aityldy.
Qaýymdastyq málimetinshe, qoldanystaǵy tártip boiynsha SES qorytyndysy nysan paidalanýǵa berilgen kezde bir ret beriledi jáne ony turaqty túrde qaita rásimdeý týraly norma zańnamada joq. Onyń ústine, sanitariialyq organdardyń ózi mundai "jańartý" rásimin júrgizbeidi.
"Mundai talaptar oryndalýy múmkin emes jaǵdai qalyptastyrýy yqtimal. Onyń saldary kassalyq alshaqtyqtarǵa, jalaqynyń keshigýine, jekemenshik balabaqshalardyń jabylýyna, kezektiń ulǵaiýyna jáne jumys oryndarynyń qysqarýyna ákelýi múmkin", - dep eskertti uiym ókilderi.
Qaýymdastyq jekemenshik balabaqshalar shaǵyn jáne orta biznestiń mańyzdy bóligi ekenin eske saldy. Uiym pikirinshe, bul sektor jańa jumys oryndaryn quryp qana qoimai, memleketke mektepke deiingi oryn tapshylyǵyn azaitýǵa eleýli úles qosyp otyr.
"Sondyqtan mundai reformalardy engizbes buryn olardy keń qoǵamdyq jáne kásibi talqylaýdan ótkizý qajet", - dep túiindedi Qazaqstandyq Úzdiksiz Bilim berý qaýymdastyǵy.
