Almaty qalasynyń týrızm salasyna tartylǵan ınvestısıalar oń qarqyn kórsetip keledi. 2024 jyly ınvestısıa kólemi 110,9 mlrd teńge bolyp, 2023 jylmen salystyrǵanda 2,1%-ǵa artty, dep habarlaıdy Dalanews.kz
Jeke ınvestorlar 35 jańa ornalastyrý nysanyn iske qosty, olardyń qatarynda 20 qonaqúı, 4 glempıng, 8 hostel jáne 3 qonaq úıi bar. Bul qaladaǵy nómirlik qordy 836 orynǵa kóbeıtip, týrıserdi qabyldaý ınfraqurylymyn aıtarlyqtaı jaqsartty. Jyl qorytyndysy boıynsha týrızm salasyndaǵy salyq túsimderi 1,9 esege ósip, 90,7 mlrd teńgege jetti.
2024 jyly Almatyda 100 shaqyrym taý soqpaǵy abattandyrylyp, negizgi soqpaqtar retke keltirildi, 450 ınfraqurylym nysany ornatyldy — aqparattyq stendter, belgiler, kúrkeler, oryndyqtar men kópirler, sondaı-aq kún panelderimen jabdyqtalǵan 13 kempıng aımaǵy ashyldy.
«Kóktóbe» saıabaǵynda «Densaýlyq joly» dep atalatyn jańa jaıaý júrginshiler baǵyty ashyldy. Bul – ashyq aspan astynda serýendep, belsendi demalýǵa arnalǵan abattandyrylǵan marshrýt. Uzyndyǵy 1,2 shaqyrym joldyń qurylysy 2023 jyly jeke ınvestısıalar esebinen bastalǵan. Baǵyt boıyna zamanaýı jaryqtandyrý, beınebaqylaý júıesi, oryndyqtar, qoqys jáshikteri men Almaty jáne taýǵa kórinis ashatyn alańdar ornatylyp, kelýshilerge jaıly jaǵdaı jasalǵan.
Týrıser men qala turǵyndary úshin tartymdy oryndardyń biri — «Medeý» bógeti. Bul – bıik taýdaǵy ataýly sport kesheninen joǵary ornalasqan biregeı gıdrotehnıkalyq nysan. Abattandyrý aıasynda munda «Medeýge» panoramalyq kórinis beretin tórt jańa sholý alańy ornatylyp, panoramaǵa sholý jasaýǵa arnalǵan alty tegin bınokl qoıyldy. Qaýipsizdikti arttyrý maqsatynda qorshaýlar men jol tósenishteri jańartyldy. Sonymen qatar, sholý alańdary men bóget boıyna beınekameralar ornatylyp, bul nysandy aralaý ári qyzyq, ári qaýipsiz boldy.
Jańa jaıaý júrginshi baǵyty — «Jumbaq joldyń» uzyndyǵy 285 metr, kúnine 2 myńnan asa adam júrip óte alady. Bul jol týrıser arasynda tanymal Gorelnık vızıt-ortalyǵyna aparady. Infraqurylym tolyqtaı abattandyrylyp, demalýǵa arnalǵan jaıly aımaqtar, aqparattyq stendter men túngi jaryqtandyrý ornatylǵan. Joba ekotýrızmdi damytýǵa jáne «Medeý» men «Shymbulaq» sıaqty júktemesi kóp baǵyttardaǵy týrısik aǵyndy azaıtýǵa baǵyttalǵan.
2025 jyly Almaty qalasy Týrızm basqarmasy uzyndyǵy 100 shaqyrymnan asatyn 10 jańa taý soqpaǵyn abattandyrýdy jáne kún panelderimen jabdyqtalǵan 3 kempıng aımaǵyn jasaýdy josparlap otyr. Buǵan qosa, Almatyda týrızmdi damytýdaǵy mańyzdy qadamdardyń biri retinde bıyl eki iri mádenı nysannyń — «Selınnyı» zamanaýı mádenıet ortalyǵy men Almaty Museum of Arts kórkemóner murajaıynyń ashylýy josparlanǵan. Bul jobalar Almatyǵa jańa mádenı jáne týrısik núkteler qosyp, qalanyń óńirdegi óner men mádenı is-sharalar ortalyǵy retindegi mártebesin nyǵaıtpaq.
Statısıkalyq derekterge súıensek, 2024 jyly Almaty týrıser sanynan jańa rekord ornatyp, qalaǵa 2 340 314 adam kelgen. Bul kórsetkish 14,8%-ǵa ósken. Almatynyń Qazaqstandaǵy jalpy týrısik aǵyndaǵy úlesi — 25,6%, al sheteldik týrıser arasynda — 53%. Sheteldik qonaqtar sany 26,9%-ǵa artyp, 686 355 adam boldy, bul 2023 jylmen salystyrǵanda 145 611 adamǵa artyq. Almatyǵa eń kóp keletin týrıser — Reseı azamattary (155 445 adam). Sondaı-aq, Úndistannan kelgen týrıser sany 2,4 esege artyp, 115 246 adamǵa jetti. Sonymen qatar, Qytaıdan (50%), AQSH-tan (34,4%), Túrkıadan (12%) jáne Ońtústik Koreıadan (3,2%) kelýshiler sany artty.
Almaty qalasyn odan ári damytý maqsatynda Almaty Tourism Bureau Mastercard kompanıasymen birlese otyryp, qalaǵa keletin týrısiń beınesi men saıahatyn sıpattaıtyn zertteý júrgizdi.
Almaty óziniń tanymaldyǵyn dáleldep qana qoımaı, jańa rekordtar ornatyp keledi. Bul qala tek Qazaqstan týrızminiń ortalyǵy emes, álem saıahatshylary úshin de tartymdy ortalyqqa aınalǵan. Qala qonaqtarǵa shańǵy kýrorttary men ekstrım-týrlardan bastap, gastronomıalyq festıválder men tarıhı ekskýrsıalarǵa deıin jan-jaqty baǵdarlama usynady. Halyqaralyq áýe qatynastarynyń keńeıýi, iri is-sharalardyń uıymdastyrylýy men qyzmet kórsetý sapasynyń jaqsarýy – Almatyny Ortalyq Azıadaǵy eń tartymdy týrısik baǵyttardyń birine aınaldyryp otyr.
