Túrkiianyń batysynda sońǵy eki táýlikte qatarynan eki kúshti jer silkinisi boldy. Sońǵysy — Balykesir provintsiiasynda tirkeldi, dep habarlaidy Dalanews.kz. RIA Novosti agenttigine silteme jasap.
Túrkiia Densaýlyq saqtaý ministrliginiń derekteri boiynsha, jer silkinisinen jalpy 19 adam zardap shekken. Olar jer silkinisi kezinde qulaý nemese terezeden sekirý saldarynan jaraqat alǵan. Tórt zardap shekken adamdy aýrýhanadan shyǵardy.
«Barlyq zardap shekkenderimiz ózderin jaqsy sezinip, bizdiń aýrýhanalarymyzda emin jalǵastyrýda. Olarǵa tezirek saýyǵyp ketýlerin tileimin», — dedi Densaýlyq saqtaý ministri.
Sonymen qatar, Stambýl mańyndaǵy Gebze qalasynda kópqabatty úi qulady. Túrik BAQ-tarynyń habarlaýynsha, úiindi astynda adamdar bar. Qazirgi ýaqytta oqiǵa ornynda izdestirý-qutqarý jumystary júrgizilýde.
A-Haber málimetinshe, bes qabatty ǵimarat qulaǵan. Oqiǵa ornyna kóptegen qutqarý brigadalary jiberilgen. Úiindi astynda adamdar qalyp qoiǵany týraly habarlar túsýde jáne izdestirý jumystary bastalǵan.
NTV telearnasynyń dereginshe, úiindi astynda shamamen 7 adam bolýy múmkin.
Órt sóndirýshiler, Tótenshe jaǵdailar jáne apat saldaryn joiý basqarmasy (AFAD) jáne izdestirý-qutqarý bólimsheleri qulaǵan ǵimarat astynan qutqarý operatsiiasyn bastaǵan. Qutqarýshylar qazir úiindilerdi tazalap jatyr.
